Nasinati sa adlaw sa pagpili

Alas 5:50 sa buntag, Mayo 12, 2025, adlaw sa paghukom.  Didto na ko sa inandam nga lawak-botaranan alang sa mga seniors-PWD uban sa akong misis ug duruha ka anak: babaye’g lalaki, kinsa maoy nagpulipulig tulod sa wheel chair nga akong gisakyan gikan sa samok na kaayong karsada ngadto sa nahimutangan sa nahisgotang lawak. Diin, may nanag-wheel chair usab nga mga botante.

Thrilling kaayo akong kahimtang. Dala ang oximeter, pirme nakong gi-monitor ang lahutay sa akong pagginhawa kay ang tangke sa oxygen para mo-supply nakog hangin gibilin man namo sa sakyanan nga didto giparking sa akong anak-lalaki sa medyo layolayo nang pribadong lugar.

Gipasabot ni misis ang mga maestrang naasayin sa naasyong seniors-PWD lawak-botaranan bahin sa akong situwasiyon ug sama sa mga buotang anghel, pulos gaan kaayo ang ilahang buot nga miasikaso namo.

Ilaha ming giesplikaran, sila na kunoy mokuha-hatod balik sa among voting ballot nga atua sa presintong naggunit sa among pangalan didto sa 2nd floor or third floor pikas building. Mao nga ila kami gipapirmag waiver nga magtugot kanila.

Sa kadelikado sa election fraud karon, maayo g'yud unta nga kami, mismo, ang moadto ug mangunay'g hungit sa among balota ngadto sa automated counting machine. Apan unsaon, tungod sa akong health condition nababagan kami.

Wala pay alas 7:00 sa buntag nahuman na mig botar. Nanag-wheel chair sa gawas nagakadaghan. May senior nga giagak sa senior ra usab niyang kuyog. Usab, may masakitong senior gikugos sa iyang anak aron lang makabotar kay tingale, nahadlok intawong dili na unya makadawat og senior cash assistance gikan sa kagamhanan.

Sa among pagpaingon sa gate, nasigpatan nako ang GMA personality ug kauban natong maglilindog sa The Freeman Banat News, Alan Domingo, kinsa morag mao pay pag-abot aron pagpangapkap og mga lab-as nga balita. Wala na lang nako siya timbayaa, kay maoy mipasulabi sa akong galamhan ang oxygen nga niadtong tungora gikinahanglan na sa nagakaawop kong pagginhawa.

Maistoryahan ko unta siya unsa kabuotan-kamasinaboton-kamatinabangon ang mga maestra ug kaubanan sa seniors-PWD voting room, kinsa sa unang higayon maoy mipasinati kanakog kasuwabe-kapaspas-kakomportable ug maka-feel at home nga piniliay diha sa ilang pagpangalagad.

Thank you, Mams and Sir. Unta, managhan kamo!