EDITORYAL — Serbisyo una, sunod na ang politika

Natapos na ang National and Local Elections 2025, bisan sa kataas sa panahon nga kini napangandaman, daghan pa gihapong mga aberya nga nasinati sa nagkadaiyang polling precincts.

Siguradong ang ubang kandidato nga dili kauyon sa resulta, gamiton kini aron mosang-at og protesta. Apan sa dili pa kini mahitabo, angay masayran sa tanan nga ang maong eleksyon dako og papel sa nahibiling tulo ka tuig sa termino ni Presidente Ferdinand Marcos Jr. Duna sab kini papel sa umaabot nga 2028 elections.  Dili lang kang Marcos kondili hasta pud sa kampo ni Bise Presidente Sara Duterte-Carpio kinsa gihugon-hugonang modagan sa pagka-presidente.

Ang gidaghanon sa makasulod nga mga senador ubos sa ilang mga partido, magdiktar dili lang sa direksyon sa pagdumala ni Marcos kondili magdiktar sab unya sa padulngan sa politikanhong tinguha sa mga Duterte sa 2028.

Apan dili gyud kini mao untay angay nga tutokan sa mga mapili, kondili ang pagbuhat sa ilang mga gipangsaad ngadto sa mga tawong nisalig ug nibotar kanila kagahapon.

Serbisyo una , sunod na ang politika.

Kay kun kining nahibiling tulo ka tuig sa termino ni Marcos pulos na lang unya politikanhong kasungian, maapektuhan ang paghatag sa mga batakang serbisyo sa katawhan ug walay kalamboan sa nasud.

Kadtong maghimo og kagubot ug makaingon sa pagkadelatar sa mga serbisyo sa gobiyerno para sa katawhan siguradong dumtan sa mga tawo karong 2028 Presidential elections.

Ang dakong impluwensiya sa mga Millenials ug Gen Z ug ingon man sa mga bag-o pang nakabotar kagahapon, makaapektar sab sa 2028 elections.

Trabaho lang unta ang unahon, serbisyo sa mga tawo ug dili usikan ang panahon sa mga personal ug politikanhong katuyoan.