Apdo sa politika

Sa politika dili ka makasandig sa imong mga kaliwat kay dunay mga panahon nga mobiya sila nimo sa ultima ora sa piniliay. May mga panahon usab nga sila magbudhi kanimo.

Sa 2004 nga nasudnong piniliay gi-junk ko sa mga Boniel nga maoy nag agni kanako sa pagbiya sa pagka magsisibya aron magpapili pagka konsehal sa lungsod sa Bien Unido, Bohol.

Ang mga Garcia nga kaatbang sa mga Boniel sa politika namalit og tag P700 ngadto sa usa ka libo ka pesos aron dili ko  botaran sa pagka konsehal. Sa wala pa ang kampanya mipasalig nako ang Garcia nga mayor sa Bien Unido nga dad-on ko niya.

Ang mga Boniel kaliwat sa akong papa. Samtang ang mga Garcia kaliwat sa akong mama.

Sa politika mas maayo pa ang imong mga classmates kay mga loyal sila.

Mao seguro kini ang rason nganong kasagaran sa mga tudloon nga sakop sa gabinite sa presidente mga classmates niya.

Sa Barangay Puerto San Pedro sa among lungsod wala makapildi nako si Mayor Garcia bisan pa sa tag P700-P1,000 nga palit niya aron dili ko botaran pagka konsehal. Ikalima ko sa talaan sa mga mananaug sa nahisgotang Barangay diin anaa usab nagpuyo ang mayor.

Sa isla sa Sagasa nga baga ang kaliwat ni mama ug daghan nga mananagat nga utangan niya, pildi ko.

Ako ning gipaambit ninyo dili tungod kay nagdumot ko  kun dili aron inyong masabtan ang apdo sa politika, aron dili mo moabot sa punto nga nahiubos ug nagmahay ka.sa mga kaliwat nimo.

Hinumdomi nga sa pulong pa ni Cebu City Mayor Mike Rama ang politika ug eleksiyon molabay ra pero ang pamilya kanunay. Busa ayaw ibaylo ang imong pamilya sa away sa politika.