Adlaw sa paghukom

Hukman na sa mga mabuot nga lungsoran ang mga nangaplay pagkasulogoon sa katawhan karong adlawa. Kinsa ang makalusot nila? Kining tanan matubag nato kon si kinsa ang atong dawaton nila.

Kadto bang mga recycled kinsa kanunay nga nagsaad kanato apan wala gyud motuman sa ilang gisaad ug subli na sad nga mipasalig sa ilang bakak o kadtong wala pa nato masuwayi ang katakos sa serbisyo?

Kulba hinam apan ang kadaghanan mora’g naanad naman sa resulta unya sa piniliay kay lagi nahaylo naman sa tinagingting sa salapi nga ilang nadawat.

Kong si kinsa ra ba kadtong mga bakakon ug kurakot mao ra ang dinagko og hinatagan kay daghan naman og pundo.

Apan walay mapili nila kay ang mga kaatbang nigamit man pud og kwarta apan midyo gamay ra ilabi na kong gikuhaan pa sa mga lider lider nila.

Laing tulo ka tuig ang tagamtamon nato ang resulta karon sa piniliay.

Kong sakto ang resulta aw dakong regalo alang sa mga tawo apan kong nasayop ang mga tawo sa pagpili aw tulo usab ka tuig nga magpuyo sa tunglo ang mga tawo tungod sa bunga sa ilang pagkahangol sa kwarta ug gitugyan nila ang kaugmaon sa mga anak ngadto sa mga kandidato nga mga demonyo nga nagpakatawo aron magsabwag sa ilang pagkadutan.

Sakit man apan mao kini ang kamatooran nga wala pa gyud nag-mature ang mga tawo nga gihimo nang kultura ang pagbaligya sa boto panahon sa eleksiyon. Sa ako na giingon kaniadto nga koprason ang kwarta niining mga kandidatoha pero pilion lang kadtong mohaum sa pagdala sa katungdanan nga isangon kanila sa katawhan.

Dili tungod kay sikat ug daghan og kwarta sila na ang pillion.

Hinumdumi nga kining mga tawhana ra ba dili na dayon makit-an sa higayon nga naa na sila sa pwesto. Maayo ra kaayo mopahiyom kong adunay camera apan kong wala dili na managad pagkahinampak.

Hinuon dunay mga subling nagpapili sa katungdanan nga bisan wala pa ang eleksiyon nagpakita og labok sa pagserbisyo sa katawhan.

Seguro parte na sa kampanya nga ini’g human pa lang sa eleksiyon mangampanya na, kini ang maayo kay mabulahan man ang mga tawo sa padayon nga serbisyo apan naa gyuy uban nga lisod kaayo pangitaon samot nga lisod duolon.

Ikaw kinsa ang imong pilion? Unsay basehan nimo sa imong pagpili? Gibase ba nimo sa kwarta o sa imong konsensya?

Sa tinuod lang dili ang mga kandidato ang atong hukman karong adlawa kon dili ang atong pagkatawo mismo kong nakakat-on na ba kita sa leksyon sa nanglabay nga mga eleksiyon, ikaw ang magbuot sa imong kaugalingon.