Ipaduol usab ang gobiyerno

Mipadangat sa iyang pagtimbaya si Presidente Ferdinand Marcos Jr., ngadto sa bag-ong napili nga Santo Papa nga si Pope Leo XIV uban sa iyang pag-ampo nga padayonon unta sa bag-ong Santo Papa ang pagdala ug pagpaduol sa simbahan ngadto sa mga kabus ug hinikawan.  Sa atong kahimtang karon, diin mokabat sa kapin 60% sa katawhan ang anaa sa self-rated poverty incidence, angay usab tingale nga ipaduol sa presidente ang gobiyerno ngadto sa katawhan.  Kining mga pag-ampo sa presidente alang sa Santo Papa makapahinumdum kanato sa mga linya sa awit nga nagkanayon, “Malayo ang tingin, wala na man’g tinatanaw.”  Fezteleern!

‘Nakasandal sa pader’

Gi-endorso sa Iglesia ni Cristo (INC) ang walo ka senatorial candidates alang karong 2025 midterm elections.  Sagol-sagol ang mga kandidato nga gi-endorso sa INC nga nag-gikan sa nagkalain-laing mga partido. Giingon nga dakong tabang ang pag-endorso sa INC. Apan aduna usa’y nag-ingon nga dumadaug na’ng daan ang gi-endorso sa INC ug igo na lang kini misakay sa popularidad sa maong kandidato. Bisan pa man, hangpon gihapon sa kandidato ang pag-endorso kanila sa INC.  Matud pa bitaw sa slogan sa usa ka bangko, “Kon ma-endorso ka gani sa INC, ‘para ka’ng nakasandal sa pader’.”  Muleeng!

Underground economye

Mikunhod ang gidaghanon sa nagparehistro ingon man nag-renew sa ilang business name sa Department of Trade and Industry (DTI) sa bulan sa Abril.  Gitumbok nga hinungdan sa pagkunhod mao ang hinay usab nga pagtubo sa ekonomiya nga sukad pa niadtong 2024. Dili maayo kining maong balita kay wala na’y mga bag-ong negosyo nga modugang unta pagbuhi sa atong ekonomiya.  Hinuon, wala mabalaka ang akong amigo, kay matud pa niya, “Sagdi lang kay naa pa ma’y mga gagmay’ng negosyo nga gitawag nato og “underground economy” sama sa manindahay’g barbecue, kwik-kwik, siomai, beef pares, pungko-pungko, balut, sigarilyo, mani ug uban pa.”  Madahaan!

Sweldo gipatas-an

Gipasar na sa Konseho sa dakbayan sa Sugbo ang ordinansa nga nagmando nga ang entry-level position sa Cebu City Hall departments magsugod na sa Salary Grade 3 (SG 3).  Gi-papas na usab sa maong ordinansa ang SG 1 ug SG 2 nga gituohan usab sa HRDO head nga si Henry Tomalabcad nga “dili pro-labor” tungod sa kaubos sa suholan nga gitagana alang sa maong mga position.  Tungod niini’ng kausaban, nakaingon ang mga empleyado sa City Hall nga, “Kaniadto ang SG nagpasabot nga “Sweldo Gamay”, apan karon nahimo na kini’ng “Sweldo Gipatas-an.”  Atala lagee!

Ngano’ng gisagpa man?

Pasakaan og kaso ni Atty. Inocencio dela Cerna si Governor Gwendolyn Garcia sa buhatan sa Ombudsman ingon man sa Comelec tungod sa giingon’g mga legal ug ethical nga mga kalapasan kabahin sa iyang kandidatura ingon man ang pagsupak sa iyang suspension order.  Morag gitataw man pag-ayo sa sumbong ni Atty. Dela Cerna ang mga giingon’g kasal-anan ni Gob. Gwen busa dili niya magamit isip depensa ang kontra-argumento sa atong Ginoo nga nagkanayon, “Kon may sayop ako, ipahayag kini sa tanan.  Apan kon husto ako, ngano’ng gisagpa mo man ako.” Pagkatoytoy!