Ipahid lang sa uban

Gihimug-atan sa Malacañang nga ang mga bollard sa NAIA, nga wala makasagang sa midasmag nga SUV, na-instalar pa sa panahon pa ni kanhi Transportation Secretary Art Tugade niadtong tuig 2019. Daw nangita man gilayon og maham-akan sa basol ang Malacañang.  Hapit na mo tulo ka tuig ang ilang pagdumala sa atong kagamhanan busa kon adunay mga kasaypanan, dili na tingale angayan nga ibasol pa sa nangagi’ng administrasyon.   Haum ni’ng kahimtanga ang panultihon nga, “Ang pagkompisal sa sala mahimong makaayo sa kalag, apan ang pagpahid sa uban sa nahimo nimo’ng sala, makapa-lungtad kanimo sa imong gitrabaho-an.”  Muleeng!

Dili makaon kay way sud-an

Gipanghimakak sa NFA-Eastern Visayas (NFA-8) ang mga pasangil nga ang bugas nga tag-P20 ang matag kilo nga gipamaligya sa gobiyerno sa maong rehiyon substandard lamang ug dili angay kaonon sa tawo.  Dugang pa sa NFA, kon ugaling adunay yellowish nga mga humay sa ilang stock, tungod kini sa limitado’ng drying facilities sa rehiyon.  Nukos-nukos man ang pamahayag sa NFA.  Moingon nga dili substandard ang ilang humay apan moangkon usab nga adunay mga yellowish nga bugas sa ilang stocks.  Matud pa sa akong amigo, “Dili gyud namo makaon ang bugas sa NFA kay wala man lage pud ‘mi sud-an.”  Madahaan!

Himoon nga endorser

Nakaani og mga pagsaway si Bise Presidente gikan sa Malacañang sa iyang pamahayag nga wala siya’y intensyon nga tabangan si Presidente Marcos, Jr., nga makab-ot niini ang P20 matag kilo nga bugas.  Makapahibulong nga human nabugto ang maayong relasyon tali sa administrasyon ug sa bise presidente, maghandum pa sila sa tabang bise presidente sa ilang mga programa.  Komedya pa sa akong amigo, “Buot tingale sa Malacañang nga himoon nila’ng endorser sa bugas ang bise presidente sama sa mga maanyag nga babaye sa kalendaryo nga nag-endorse sa ilimnon’g makahubog.”  Pagkatoytoy!

Nahuman na sa report

Gibutyag ni Anti-Red Tape Authority (ARTA) Director General Secretary Ernesto Perez nga adunay 131 ka mga local government units (LGUs) sa tibuok nasud ang mapasaka-an og kaso tungod sa kapakyas niini pagtuman sa kamanduan  sa pag-streamline ug pag-digitize sa ilang mga serbisyo.    Dili yano nga pagpalit og suka ang maong kamanduan kay nagkinahanglan kini og pundo. Kon pugson gyud ang mga LGU, basin maghimo-himo na lang ang naulahi og report nga nahuman na nila ang proyekto.  Matinuod na unya ang obserbasyon nga, “Karon’g panahona, daghan proyekto nga 100% sa report, apan 0% sa aktuwal.”  Fezteleern!

Natural nga kinaiya

Miawhag si Cebu 3rd District Representative Pablo John Garcia ngadto sa iyang igsoon nga si Cebu Governor Gwendolyn Garcia nga motuman na lang sa kamanduan sa Ombudsman mahitungod sa iyang suspension ug nga i-reserba na lang niya ang iyang mga legal nga argumento ug depensa didto sa korte.  Sukwahi kini sa tambag sa mga abogado sa gobernadora nga mao karon ang iyang gituman.   Matud pa bitaw sa panultihon, “Kon aduna kay awtoridad ug gahum, aduna ka gayo’y natural nga kina-iya nga magsupak-supak.”  Atala lagee!