Kinahanglan boluntaryo ang pagpakasal

Dear Atty. Divine,

 Ang akong igsuon nga lalaki nga nagtungha pa sa college, adunay girlfriend nga nag- eskwela pa sab. Ang ginikanan sa iyang girlfriend estrikto kaayo ug ilang nahibaw-an nga aduna nay hinigugma ang ilang anak. Karong bag-o, gipatawag ang akong igsuon sa mga ginikanan sa babaye kay gusto nilang ipakasal silang duha kay dili daw sila gusto nga mapareho ang ilang anak sa ubang babaye nga mabuntis ug unya biyaan lang sa lalaki. Ang akong igsuon dili pa ready nga magminyo hasta ang iyang girlfriend, ang akong pangutana kun makapugos ba ang mga ginikanan sa babaye nga ipakasal sila? Daghang salamat. — Rica

Dear Rica,

 Kun dili pa andam nga magpakasal ang imong igsuon ug ang iyang hinigugma, dili mapugos ang mga ginikanan kanila. Basi sa Article 2 sa atong Family Code, usa sa mga importanteng rekisitos sa kaminyuon gawas sa legal age sa parties, mao ang consent o pagtugot nga freely given ngadto sa nagkasal kanila. Buot ipasabot nga ang pagpakasal kinahanglan boluntaryo, dili pinugos ug dili tungod sa desisyon sa mga ginikanan. Ang kaminyuon usa ka lifetime commitment busa kinahanglan preparado ang magtiayon nga mosud niini. Ang maayong buhaton sa imong igsuon og sa iyang girlfriend mao ang pagpakigsulti sa mga ginikanan niini nga dili pa sila andam nga magpakasal ug ila lang kining buhaton kon makatapos na sila sa pag-eskwela og aduna na silay income aron di sila mamahimong dependent sa ilang mga ginikanan. Thank you and God Bless. —Atty. Divine

* * *

 Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.