Balik sa naandang panginabuhi

Mayo  4, 2025: Ikatulong

Domingo sa Pasko sa Pagkabanhaw

Mga Pagbasa: Buh. 5;27-32

/Sal. 30/Gip. 5;11-14/Jn. 21;1-19

Ang panagat maoy panginabuhi sa mga unang tinun-an sa atong Ginoo sa wala pa sila magkakita ug magkakuyog. Ila kining gitalikdan sa dihang nikuyog sila kaniya sa iyang misyon nga nilanat og balig tulo ka mga tuig. Apan niabot ang panahon diin ang ilang gisaligan nga magtutudlo ang nalansang man hinuon sa krus.

Alang kanila usa man kni ka dakong kaparotan. Makapawala sag ana ug kadasig. Mao nga nakahukom sila nga mobalik sa ilang naandang panginabuhi nga mao ang pagpanagat apan ang nahitabo sama sa nahitabo sa dihang sila gitawag sa Ginoo kaniadto. Wala silay nakuha sa paghago nila tibuok gabii.

Ug sa sunod adlaw sa dihang gimandoan sila sa Nabanhaw nga Ginoo nga wala nila hiilhi tungod tingali sa naghinobrang kasub-anan. Human sila motaktak sa mga pukot nakakuha sila og daghang mga isda. Pahinumdom lamang kini nga kun wala ang Ginoo wala gyud kitay kangho, wala kitay mahimo.

Gimandoan sila pagpadala og mga isda aron iapil sa mga sinugba nga ilang pagaambitan. Ang maong talan-awon nagpapukaw nila sa kamatuoran nga dili na gyud mahitabo pa nga mobalik sila sa ilang naandang panginabuhian.

Adunay mga panahon nga mo-relapse kita sa atong tinguha nga mosunod sa atong Ginoo. Gumikan sa mga kabalaka ug mga suliran buot na lamang kitang mobalik sa mga naandan natong pagkinabuhi. Buot kitang motalikod sa atong mga panaad ug mga panumpa.

Nahikalimot kita nga diha sa atong pagsunod sa Ginoo wala nay lingiay sa atong kanhiay kay usahay ang maong kanhiay usa man ka dakong babag sa atong panaw padulong sa kamatuoran. Dili kita angay mahadlok kay ang Ginoo adunay saad alang kanatong tanan sukad pa niadtong mga panahon sa mga apostoles. “Ako Magauban Kaninyo sa Kanunay hangtud sa Katapusan sa KalibOtan!”