Paabangan ang boto

Tungod kay nagkaduol na ang eleksiyon, gilauman sa Comelec nga mosaka ang gidaghanon sa vote buying ug abuse of state resources (ASR) sa mga kandidato.  Gidasig sa Comelec ang publiko nga padayon kining motaho sa mga kaso sa vote buying ug ASR sa ilang lugar.  Dili pa nato masayran kon unsa gayod ka seryoso ang Comelec ni’ng ilang kampanya batok sa vote buying.  Apan, agi’g paneguro, kinahanglan nga mag-amping ang katawhan ug ang kandidato.  Sakto ang ideya sa akong amigo nga “Dili niya ibaligya ang iyang boto apan mahimo ra kini’ng abangan og usa ka oras.”  Madahaan!  

Dinali-dali ang implementasiyon

Dili una mosalmot ang city government sa Danao sa pag-distribute sa bugas nga tag-P20 ang kilo hangtod nga aduna na’y klaro nga guidelines sa pag-implementar nga mahan-ay alang sa programa. Daghang pangutana ang gipasupot ni Danao Mayor Mix Durano kabahin sa pamaagi sa implementasyon. Tataw nga gidali-dali sa national government kini’ng maong programa ug daw gitumong lang kini sa pagdani sa boto sa katawhan.  Haum niini ang panultihon nga “Ang labing maayong paagi nga mahuman ang usa ka gimbuhaton mao ang pagdali-dali pagbuhat niini hangtud nga masinati na ang kapalpakan, ug aron basolon dayon ang uban.”  Muleeng!

Gilansang sa krus

Mideklarar og gubat batok sa pagpamakak ug dis-inpormasyon si PNP Chief Gen. Rommel Marbil. Dugang pa ni Marbil, gubat kini nga kinahanglan pakigbisogan ug pagada-ugon dili pinaagi sa armas kon dili sa pagmabinantayon tungod kay sa atong paglaban sa kamatuoran, ato usab gidepensahan ang katawhan.  Andam ba kaha si Gen. Marbil sa pagsakripisyo sa iyang kaugalingon ni’ng mao niyang kawsa?  Matud pa sa akong amigo, “Basin nalimot si Gen. Marbil nga adunay misulti ug naikgbisog sa kamatuoran mga 2,000 anyos na ang milabay, apan gilansang man siya nato sa krus.”  Fezteleern!

Naundang lang dayon

Namahayag si Bise Presidente Sara Duterte nga nahunong ang P20 matag kilo nga rice program sa Marcos administrasyon tungod kay nasayod sila nga maong saad dili nila matuman.  Nasayran nga nahunong ang rollout usa lamang ka adlaw human kini gisugdan.  Apan mipasabot ang Department of Agriculture nga gihunong ang rollout kay nangayo pa sila ug katin-awan sa Comelec kon makapadayon ba sila sa maong programa.  Tamabaloslos ang DA.  Ngano’ng wala man nila klaroha daan sa Comelec.  Makapahinumdum kini sa linya sa awit nga nagkanayon, “Love is ended before it began (nga sa ato pa, ‘Wala pa gani gipanamkon, napunit na’).”  Pagkatoytoy!

Ma-sesante sa pwesto

Gipanghimakak sa mga residente sa Dalaguete ang pasangil nga ang kaso nga ilang gipasaka batok kang incumbent ug reelectionis Mayor Ronal Allan Cesante adunay bulok politika ug nga gibase lang kini sa mga kamatuoran ug ebidensya.  Nasyaran nga gipasaka ang kaso sa wala pa ang campaign season.  Kon unsa ang gibug-aton sa kaso ni Mayor Cesante, anaa na sa husgado ang paghukom.  Matud pa sa akong amigo, “Kinahanglan bug-at usab ang ebidensya sa Mayor pag-alkontra sa akusasyon kay kon dili, basin MA-SESANTE siya sa iyang pwesto.”  Ateerr!