Maulaw mahibaw-an

Alang kang Senador Miguel Zubiri, ang paga-usbaw sa suholan sa mga mamumo-o taliwala sa nagpunay usab nga pagsaka sa presyo sa palaliton dili na usa ka kapilian kon dili may kalabot na sa hustisya ug kaangayan.  Dili mga matam-is nga saad ang gikinahanglan sa mga mamumo-o kon dili tinud-anay nga pagpakabana.  Makapahinumdum sa trabahante nga gipahimangnoan sa iyang agalon nga dili ipanabi sa uban nga giusbawan ang iyang sweldo. Niini, mitubag ang mamumo-o nga, “Ayaw kabalaka Boss, kay sa tinuoray lang, maulaw gani ko nga mahibaw-an sa uban kon pila ra ang akong sweldo bisan gi-umentohan na."  Pagkatoytoy

Ma-impyerno ang mamakak

Gisalikway ni Presidente Marcos ang resulta sa imbestigasyon sa Senado nga gipangulohan sa iyang igsoon nga si Senador Imee Marcos nga nagpadayag nga ang pagdakop ni kanhi Presidente Rodrigo Duterte adunay politikanhong katuyoan ug gitumong sa pagsabotahe sa kanhi presidente ug kang Bise Presidente Sara Duterte.  Luyo ni’ng mga akusasyon ug mga pagpangulipas, anaa ra sa katawhan ang pag-ila kon kinsay nagsulti sa tinuod ug kinsa ang namakak.  Makapahinumdum sa akong bata nga pag-umangkon nga nagtoo nga namakak ang iyang lola busa iya kini’ng giingnan nga, “Maadto jud ka sa impyerno ‘La, unya malata ka didto.”  Atala lagee!

Mosimba pud si Satanas

Gisirad-an sa NBI ang usa ka simbahan didto sa Baras, Rizal tungod kay giingon nga gihimo kini nga takuban sa illegal recruitment.  Wala hinganli sa taho ang maong simbahan kinsa giingon nga nangolekta og tag-50 mil matag biktima, nga sagad mga sakop ra sa ilang simbahan, bugti sa saad nga makatrabaho sa laing nasud.  Wala na gyuy gili-atan ang mga mangingilad kay bisan ang simbahan himoon na man nila’ng kasangkapan sa ilang pagpangilad.  Tinuod gyud tingale ang pagya-komedya nga, “Bisan gani si Satanas mosulod man ug mangalawat sa simbahan.”  Madahaan!

Adunay libre’ng bugas

Gipaabot pa sa kagamahan sa dakbayan sa Sugbo ang guidelines sa pagbaligya sa tag-P20 matag kilo nga bugas kay segun ni Mayor Raymond Garcia, gikinahanglan pa niya ang dugang katin-awan kabahin sa mga detalya sa maong program kay nadungog lamang kini niya sa mga news reports.   Matud pa usab sa akong amigo, “Dili angay’ng magdali ang syudad kay gawas nga nakapaabot ang katawhan og tulo ka tuig una matuman ang saad sa presidente, aduna man pu’y libre’ng bugas ang dakbayan nga gipang-apod-apod sa mga politiko.”  Muleeng!

Hagbong gihapon

Taliwala sa mga pagduda ug mga kahingawa kabahin sa kalidad ug sa kamalahutayon sa P20 matag kilo nga programa sa bugas sa kagamhanan, mipasalig ang NFA-Central Visayas sa publiko nga ang pundo nila’ng bugas nakapasar sa standard sa kalidad nga gilatid sa balaod.  Tugotan nato nga nakapasar ang kalidad sa bugas sa barahan sa kagamhanan apan ang pangutana kon nakapasar ba kini sa barahan sa panglasa sa katawhan?  Kay matud pa sa akong amigo, “Pwede man ma-adjust ang barahan (standard) sa kagamhanan, apan kon dili gyud angayan kan-on sa tawo ang bugas, hagbong gihapon kini sa barahan sa katawhan.”  Fezteleern!