Lihok diha sa kahilom

Diyotay nga kibo sa kaayo imantala gyud dayon sa social media uban ang panghinaot nga ang si bisan kinsa nga nakakita ug nakasunod niini ang mopadala dayon og mga stars aron pagpadugang sa mga points nga mahimong i-monetize puhon.

Kining maong pamaagi maoy nakapaaghat sa kadaghanan nga mamahimong vloggers o dili ba YouTuber ug mga content creators.

Ang nakadaot kay daghang mga content creators kang kansang mga content wala gyuy tumong ug walay hinungdan.

Puwera lamang sa uban nga makahatag og husto ug makatabang nga mga content aron ang kadaghanan makakat-on.

Mayo 1 na usab. Gani fiesta namo dinhi sa parokya. Ning maong pagsaulog sa pangilin ni San Jose mamumuo daghan kaayong mga butang nga angayan natong ibutang sa usa ka mapamalandungon nga pagsaulog sa kinabuhi ug pagkabalaan ni San Jose ang Bana ni Maria, kadtong ama ama sa atong Ginoo ug usa ka panday.

1. Sa kahilom siya naglihok. Wala gani natala nga mga pulong nga iyang nalitok diha sa balaang kasulatan. Apan ang maong kahilom dili kahuyang kondili kusog ug kalig-on.

2. Iyang gibuhi ang iyang panimalay diha sa pagpamanday. Nagpatulo siya sa iyang singot aron dunay makaon ang atong Ginoo kuyog sa inahan niini nga si Maria Santisima.

3.  Matarong siya nga tawo ug ang pagkamatarong nagpasabot man og pagkamatinumanon sa Balaod sa Dios.

Apan luyo sa maong pagkamatarong ug pagkamasinugtanon, anaa ang pagkamaluluy-on. Dili siya buot nga mahimutang sa kauwaw si Maria Santisima busa nakahukom siya nga makigbulag kaniya sa hilom.

4. Nagpaila lamang kini nga balaan ang pagtrabaho sanglit pagpadayag man kini sa atong kaugalingon ug paghatag sa atong kaugalingon og dignidad aron makakaon.

5. Ang tawong tapulan dili angayang pakan-on busa ang mga tapulan ug taspokan nga mga tawo, mga tinunglo ug ang bugtong paagi aron mahanaw ang maong tunglo mao man ang mga pag-ampo ug madasigong kakugi.

Viva San Jose!