Dili gusto ang Comelec nga mamantsahan

Dili na diay mahimong mogamit ang Comission on Elections o Comelec og mga sakyanan nga nga iya sa mga lokal nga kagamhanan ug bisan sa mga barangay nga gamiton nila paghakot sa kagamitan sa umaabot nga eleksyon.

Migahin sila og pundo aron gamiton sa pag-abang og mga sakyanan nga ilang magamit. Kini aron malikayan nga mahatagan og bulok ang ilang himoon kay lagi aduna pa may mga incumbent LGU officials nga nagpasubli sa pagpapili sa umaabot nga eleksiyon.

Nakadayeg ako niining makong lakang sa Comelec aron mapreserbar ang ilang integridad nga kanunay mabulit sa mga pagduda sa katawahan, wala silay kadaganan kay maputos sila sa away ug pagsaway sa mga tawo nga dili makauyon sa resulta sa piniliay.

Bitaw maayo ra pud kining dili sila magsalig sa LGU. Apan ang pangutana karon dili ba sila maglisod sa pagdala sa mga gamit ngadto sa tagsatagsa ka presento ilabi na kadtong atoa sa mga lagyong dapit nga ang mga sakyanan ra sa kalungsoran ug barangay ang madali dali. Dili kaha makautot-utot ang mga sakyanan nga ilang pag abangan o mosukol pud kaha sa siete mil pesos nga budget.

Matud ni Atty. Francisco Pobe, ang director sa Comelec-7, nga dugay naman kini nga patakaran nila maong ipatuman niya kay mao man gyud ang lagda. Alang nako o ni bisan kinsa nga wala kaayo masuheto mora’g makapakugang kay kong wala ko masayop mao man ang naandan kada eleksiyon nga ang mga service vehicle sa mga LGU ug bisan gani sa barangay ang madali dali sa pagdala sa mga gamit sa Comelec ngadto sa ilang destinasyon. Gani duna pay pakapin nga mga pack meals.

Dako baya kaayo og tabang sa Comelec ang mga resources sa mga LGU ug barangay ilabi na kong dinalidali. Gawas pa, parehas ra man sila nga ahensiya sa kagamhanan ug ang mga sakyanan iya usab sa gobiyerno.

Kong limpyo ang konsensya sa mga taga Comelec wala silay angayan nga ikabalaka bahala na kon dunay mga mosaway kay ang importante mapadali ang proseso. Pero gipatigbabaw man sa ilang labaw ang prinsipyo, aw maayo hinuon ug angayan usab natong suportahan kay gusto ra man niini mapanalipdan ang ilang integridad.

Sa pikas bahin 90% na nga andam ang Comelec sa umaabot nga eleksiyon, diin ang 10% nga kuwang mao nalang ang execution o pagpatuman niini sa adlaw sa piniliay. Karong adlawa gikatakdang sugdan ang pag apod apod sa mga Automated Counting Machines, samtang nakahan-aw na ang pagpahigayon sa final testing and sealing sa Mayo 6 hangtud sa Mayo 7.

Sa seguridad wala usab silay nakita nga hulga diin malinawon ra sa kinatibuk-an ang Region 7 nga naglangkob nalang karon sa Cebu ug Bohol. Naay pipila ka dapit nga anaa sa yellow category apan wala matud pay angayang kabalak-an kay kontrolado man kini sa mga tinugyanan sa balaod.