Pamolitika sa bugas
Ang P20 kada kilo nga bugas humay nga gipasalig sa administrasyong Presidente Ferdinand Marcos Jr. nga sugdan pagbaligya sa Sugbo ug Kabisay-an sa sunod semana wala pay klarong detalye unsaon sa pagpatuman. Peligrong mahisama sa ubang mga programa sa gobyerno nga maayo lang sa istorya.
Klarong timaan sa kakuwang sa pangandam: Ang mga mamaligyaay sa kamerkadohan, nga maoy labing lapad ug sayon nga tinubdan sa bugas humay bisan sa labing lagyo nga mga barangay, wala paapila sa pagplano sa programa. Bugtong nahibawo mao rang mga politiko nga alyado sa Malakanyang.
* * *
Imbes mokanaog nisulbong hinuon ang presyo sa bugas humay sa administrasyong Marcos, sama sa nahitabo sa gisundan nga pamunoan ni kanhi Presidente Rodrigo Duterte, tungod sa:
Kapakyas pagtabang sa mga mag-uuma sa pagpalambo sa lokal nga produksiyon sa bugas humay (sukwahi sa subsidy nga nadawat sa mga mag-uuma sa ubang kanasuran gikan sa ilang gobiyerno); ug
Kapakyas pagbungkag sa rice cartel nga nagmaniobra sa suplay ug presyo sa bugas humay (maong wala mohagsa ang presyo bisan sa paglaslas sa buhis sa imported rice ug pagbarato sa world market).
* * *
Gawas sa kapakyas pagtabang pagtikad sa mga umahan, gilawog sa gobyerno ang mga mag-uuma ngadto sa hakog nga mga negosyante. Bisan sa pasalig sa National Food Authority (NFA) nga P24 kada kilo ang ilang palit sa tipasi, nireklamo ang mga mag-uuma sa Bohol ug Mindanao nga napugos pagbaligya og P14 ra kada kilo kay wala igkita ang taga NFA.
Pagpabiling hawod sa rice cartel, nga wala pay negosyante nga nasilotan, nakapasamot sa pagduda nga duna silay koneksiyon sa Malakanyang.
* * *
Dako ang posibilidad nga ang P20 kada kilo nga bugas humay ipatuman pinaagi sa mga mayor. Nga walay interes sa pagseguro nga makaabot sa labing kabos ug nagkinahanglan. Kay mas interesado unsaon paggamit para sa eleksiyon sa Mayo 12.
Bisan sa tanang pagarpar sa Malakanyang nga matinuod nang saad sa presidente, wala silay tinuod nga tinguha paghaw-as sa katawhan gikan sa kalisod. Maong imbes tabangan ang katawhan pagbarug sa ilang kaugalingong mga tiil, pugson sila sa pagpadayon sa pag-amen, pagluhod ug pagpakilimos sa mga politiko para sa labing batakan nilang mga panginahanglan. Sama sa bugas.
* * *
- Latest
