EDITORYAL - Asian Pope Francis

Gikatakda na usab nga magbotohay ang Conclave sa mga Cardinals sa Simbahang Romano Katoliko aron magpili og mohulip sa mitaliwang si Pope Francis kinsa gikatakdang ilubong ugmang adlawa didto sa Vatican.

Tungod niini, ang nagkadaiyang mga kanasuran nga nagdominar ang Romano Katoliko nag-iyahay og pangindahay ug nituboy para sa ilang kababayang mga cardinal nga miyembro sa Conclave nga maoy pilion aron molingkod sa trono ni San Pedro.

Apil na niini ang mga Pilipino nga lanog kaayong nangampanya nga si Cardinal Luis Antonio Cardinal Tagle maoy mopuli.

Si Tagle, 67-anyos, kasamtangang Pro-Prefect of the Dicastery for Evangelization  sa Vatican lanog kaayong gituboy sa mga Pilipino sa Social Media. Apan dili lang si Tagle ang cardinal-electors sa nasud, naa pa silang Pablo Virgilio Cardinal David ug Jose Cardinal Advincula.

Kinaiya na sa mga Pilipino nga mag-iyahay og tuboy sa ilang paboritong kandidato o tawo ug karon hasta sa pagpili og mopuli sa Santo Papa mura og gisusama nila aning ilang mga politiko.

Apan ang Catholic Bishops’ Conference of the Philippines (CBCP)  nanawagan sa publiko nga hunongon kining pangampanya kay basin kun si Tagle maoy mapilian, mura og naimpluwensiyahan ang Conclave.

Apan kinsa man gud ang mga Pilipino para makaapektar sa 1.4 bilyong Romano Katoliko tibuok kalibutan?

Sukad sa kasaysayan sa Vatican, tanang nahimong Santo Papa pulos gikan sa Uropa, si Pope Francis pa maoy labing una nga gikan sa Latin America kay siya usa man ka Argentinian.

Wala pay napiliang gikan sa Asya ug sa Africa. Dinhi sa Asya dili dominante ang Simbahang Romano Katoliko tungod kay daghang relihiyon dinhi nga dunay daghang sumusunod sama sa Islam, Buddhism ug Hinduism, pun-an pa ang nagkalain-laing Kristiyanong mga simbahan ug protestante.

Apan angkunon man o dili, kun pinaagi sa grasya sa Kahitas-an mapilian si Tagle, siya maoy pinakaunang Santo Papa gikan sa Asya ug usa siya ka Pilipino.