Gustong idonar ang yuta sa iyang kapuyo

Dear Atty. Divine,

Aduna ko karoy kapuyo ug dugay na mi nga  nagbuwag sa akong asawa apan wa pa ma annul ang among marriage. Wa mi anak sa akong asawa ug akong nahibaw-an  nga aduna na  siya’y laing pamilya. Aduna koy napalit karon nga property ug nakapangan kini sa akoa. Apan matud pa sa akong igsuon nga mamahimo daw nga mangayo og bahin ang akong kanhi asawa sa maong property kay wa pa man ma annul ang among kaminyuon. Gusto unta nako nga idonar nalang ngadto sa akong kapuyo kining maong property og mamahimo ba kini nako nga buhaton? Daghang salamat. -- Jeff

* * *

Dear Jeff,

Bisan pa kun dugay na kamo nga nagbuwag sa imong asawa apan tungod kay wa pa ma annul ang inyong kaminyuon, nagpabilin gihapon kamong minyo sa mata sa atong balaod. Tungod niini, ang bisan unsa nga kabtangan nga inyong mapalit makonsiderar kana nga gipanag-iya kaninyong duha sa imong kanhi asawa og aduna siyay katungod unya nga mo claim sa iyang bahin. Samtang kalabot sa imong plano nga idonar sa imong live-in partner, di kana mahimo kay gidili kana sa balaod. Ang Article 87 sa atong Family Code nagdili sa magtiayon sa pagdonar og butang sa usa’g usa og lakip nga gidid-an niini kadtong manag live-in partner. Busa ang maayo nimo nga buhaton karon mao ang pagpa annul sa imong kaminyuon pinaagi sa pagpasaka og petition ngadto sa korte. Mamahimo sab nga imong ibaligya ang imong property og  mopalit lang ikaw pag-usab kon ma annul na ang imong marriage aron kalikayan ang problema sa umaabot. Thank you and God Bless!--Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.