Pagpamalandong Matag Domingo Kadtong Walay Sala

Maayong Balita

Silotan sa kamatayon pinaagi sa pagbato ang si bisan kinsang nasakpan nga nanapaw. Ang mga magtutudlo sa Balaod ingon man ang mga Pariseo nanghita gyud og paagi aron ilang mabitik ang atong Ginoo. Kun ang atong Ginoo moingon: “Batoa kining maong babaye hangtud mamatay!” Moingon ang mga kritiko sa atong Ginoo nga wala siyay kaluoy. Ug kun moingon usab siya nga dili hukman sa kamatayon ang mga kritiko mosaway sa iyang walay paghatag og bili sa balaod ni Moises kalabot niini. Ang atong Ginoo nihagit sa ilang tagsa tagsa ka  mga tanlag. Si kinsa kadtong walay sala ang unang mobato ning maong babaye! Butang nga nakapaatras kanila. Sugod sa mga tigulang hangtud sa mga batan-on.

Kasinatian

Daghan kanato ang nahimong far sighted kun maghisgot kita og mga sayop ug sala. Mas tataw nato ang sala sa uban apan nahikalimot kita sa atong kaugalingong kahugawan. Ang maong kasinatian nag aghat kanato nga sa dili pa kita molabay og bisan unsang hugaw ug baho ngadto sa uban ato unang tan-awon ug aninawon ang atong kaugalingong kahugawan ingon man kasaypanan.

Lihok

Himoa ang pag-usisa sa imong tanlag sa dili ka pa matulog o sa dayon nimong mata sayo sa buntag. Nahimo ka bang mahukmanon sa uban? Imo bang giisip ang imong kaugalingon nga labaw pa kaayo kaysa uban.

Pangamuyo

Tanan: Makaamgo unta kami Ginoo sa among kahuyangan. Tabangi kami nga makita namo ang among kaugalingon nga sama sa uban dunay mga kasaypanan.

Salamat sa imong kaayo ug kaluoy ug madasig unta kami sa pagpakita sa among kaluoy alang sa among isi’g ka ingon. Ikaw nga buhi ug hari hangtud sa kahangturan. Amen.