EDITORYAL - Nganong magdasok sa siyudad

Magpadayon og dako ang populasyon sa mga dagko ug gagmay nga siyudad dinhi sa Pilipinas ug dili na kini mausab pa, dili lang populasyon kondili padayun ang paglambo niini.

 Samtang ang mga naa sa probinsya magpabiling tig-supply og mga tawo isip mga trabahante o trabahador aning mga siyudad. Dili lang kay naa sa siyudad ang halos tanang pwedeng matrabahoan kondili naa sab sa mga siyudad ang mas dagko og minimum wage kun itandi sa mga probinsya.

Mao sab kini ang rason nganong daghang mga taga probinsya nga manimpalad gyud nga makakita og trabaho sa mga siyudad kay sa probinsya diin sila lumad gawas nga walay mga trabahong masudlan, gagmay sab ang sweldo sa inadlaw.

Bisan gani ang mga libud-suroy sa siyudad gikan man sab sa probinsya tungod kay sa ilang lugar wala may mohatag kanila og limos kun magpakilimos sila diha sa dalan, apan kun sa mga siyudad mokita gyud sila tungod sa kadaghan sa mga tawo.

Kini nga sitwasyon dunay maayo ug dili maayong epekto sa mga siyudad ug sa mga probinsya.

Sa siyudad, maayo kini tungod kay baskog ug paspas ang dagan sa negosyo kay daghan man ang mga tawo, apan ang dili maayo kung dili makaapas ang lokal ug nasudnong kagamhanan pag-provide sa mga imprastraktura, pagpakgang sa mga krimen ug uban pa.

Sa mga probinsya, maayo kini tungod kay ang ilang mga molupyo nga nanarbaho sa mga siyudad makadala man og kwarta ug makatuyok kini sa ilang lokal nga ekonomiya, ang dili lang maayo niini kay anugon ang higayon nga magamit ang ilang work force para pagpalambo sa ilang kaugalingong lugar kay toa man sila nanarbaho sa mga siyudad.

Labing maayo nga duna gyuy balanse  ang mga siyudad ug mga probinsya.