EDITORYAL - Pork barrel, Confidential funds

Sa pagkahitabo sa pagkahagsa sa usa sa mga light fighter jets sa Philippine Air Force nga nikalas sa kinabuhi sa duha ka piloto, nilanog ang panawagan sa halos tanang hut-ong sa katilingbang Pilipino nga ipahunong na kining paghatag og pork barrels ug confidential funds ngadto sa mga magbabalaod ug pipila ka mga ahensiya sa gobiyerno.

Kaning pork barrel nga giusab na ang pangalan karon human naisyu ug gipaimbestigar sa panahon ni kanhi presidente Benigno “P.Noy” Aquino, naa lang gihapon sa mga magbabalaod.

Samtang duna say mga ahensiya o departamento sa gobiyerno nga wala man unta malambigit og law enforcement ang ilang papel. Dili man sila mga sundalo o mga polis ug law enforcement agencies sa gobiyerno?

Pagkakaron,  nag-atubang og impeachment complaints si Bise Presidente Sara Duterte-Carpio diha sa Senado may labot sa P125 milyones nga confidential fund sa iyang buhatan kun asa napadulong.

Atol sa inquiry sa lower house, nigawas ang pangalan ni Mary Grace Piattos, apan sa pagsusi sa Philippine Statistics Authority (PSA) walay narehistrong nagdala aning pangalan.

Walay rekord nga dunay susama og pangalan nga natala sa ilang buhatan.  Apan sa report sa One News Ph, si House Deputy Majority Leader Paolo Ortega V mibutyag nga dili lang diay si Mary Grace, naa pay "Pia Piattos-Lim," ug "Renan Piattos."

Duna pa gyuy laing nahatagan og pundo nga ginganlan og "Xiaome Ocho." Murag og modelo sa Chinese made nga cellphone nga nigawas niadtong tuig 2018.

Sa 1,992 ka mga pangalan nga matud pa na-linked sa OVP confidential fund, 670 lang niini ang posibleng dunay rekord sa PSA.

Kaning pundo sa pork barrel ug confidential funds, mas maayo pang ipalit kini og dugang gamit sa Armed Forces of the Philippines. Ang pangutana, mosugot kaha sila?