EDITORYAL - Importante ang kinabuhi

Usa ka subo nga balita ang nadawat sa katawhang Pilipino kagahapon human nga gibutyag sa kadagkoan sa Philippine Air Force nga dunay usa sa FA50-PH Lead-In Fighter Trainer (LIFT) niini ang na-missing samtang naglupad padung sa usa ka misyon.

Atol ning pagsuwat, wala pay dugang gihatag nga impormasyon ang PAF u gang Armed Forces of the Philippines  (AFP) kung unsa nay nahitabo sa duha ka piloto niini.

Ang Pilipinas adunay 12 ka FA50-PH nga napalit sa panahon ni kanhi Presidente Benigno “P.Noy” Aquino nga maoy nagsilbing unang higayon nga nabalik ang PAF sa supersonic age human giretiro niini niadtong tuig 2005 ang nahibiling mga Northrop F-5 Freedom light fighter jets tungod sa kalisod sa pagpangita og mga spare parts ug nibugnaw na sab ang tensiyon sa Cold War tali sa West ug sa East. Gawas pa sa maong rason nagtungas sab ang ekonomiya sa nasud adtong panahona ug ang pagmentinar og mga abyong sama niini dili praktikal sa kasamtangang panahon.

Daghan ang wala masayod ani, ang inahan ni P.Noy nga si kanhi presidente Corazon “Cory” Aquino mao sab ang nagpapalit sa mga brand new sab gikan sa Italy nga mga Agusta S211 Aermachi trainer jets para sa mga kadeteng piloto. Ang S211 gigamit sab sa PAF para sab sa pagpatrolya sa teritoryo sa Pilipinas apil na didto sa West Philippine Sea ug pangsuporta sa mga operasyon sa militar kontra insurhensiya.

Ang mga FA-50PH nga gikonsiderar sab nga light fighter jet napalit nga brand new gikan sa Korean Aerospace Industry sa South Korea atol sa paginit sa tensiyon diha sa West Philippine Sea ubos sa administrasyon ni P.Noy.

Paagi sab kini sa PAF aron hinay-hinay nga mabansay ang mga bag-ong henerasyon nga mga piloto niini sa mga supersonic aircraft kay nagtinguha kining mopalit og multi-role fighters sa umaabot nga panahon.

Ang na-missing nga abyon gikatahong padung sa Mindanao aron suportahan ang tropa sa gobiyerno nga naka-engkwentro sa mga rebeldeng New People’s Army, apan wala na kini nakabalik.

Limitado lang ang FA-50PH assets sa PAF, karon na-missing pa gyud ang usa. Apan ang abyon mapulihan ra  apan dili ang kinabuhi sa mga piloto.