Patas o Partido

Unya na sa unang semana sa Hunyo ning tuiga sugdan ang pagdungog sa Senado sa reklamong impeachment batok kang Bise Presidente Sara Duterte Carpio tungod kay naka eleksiyon break na ang Kongreso. Eleksiyon na sa Mayo 12 ning tuiga busa ang posibilidad adunay bagong dagway nga napili o napili pag usab sa Senado.

Ang impeachment usa ka politikal nga proseso nga ang tumong mao ra gayud ang pagtangtang sa usa ka impeachable opisyal sa iyang katungdanan sama sa bise presidente. Sa atong Batakang Balaud adunay 31 ka mga impeachable nga opisyals nga mao ang presidente bise presidente, chairman ug duha ka Commissioners sa Civil Service Commision ug Commission on Audit, chairman ug unom ka commisioner sa Commission on Elections, chief justice ug 14 ka associate justices sa Korte Suprema ug Ombudsman.

Sa kasong impeachment ang gireklamo politiko, ang mo-prosecute politiko ug ang maghukom mga politiko.

Dili ikalimod nga ang pagpalabang sa Article of Impeachment sa Ubos Balay Balauranan usa ka numbers game. Sa Senado mao ba gihapon kini o kinahanglan nga patas sila sa ilang pagdesider sa kaso?

Ang patas nga hukom makabasi sa mga ebidensiya nga ipresentar o isumitir sa gireklamo ug nagreklamo nga kinahanglang clear ug convincing o overwhelming preponderance aron makonbikto ang gireklamo.

Apan kun ang paghukom sa mga senador ibasi sa baruganan sa ilang partido maingon nato nga numbers game gihapon sa Senado. Busa sa moabot nga eleksiyon kinahanglan nga paningkamotan gayod sa mga Duterte nga modaug ang ilang mga kandidato sa pagka Senador aron dili makuha ang 18 nga boto sa mga Senador aron matangtang sa iyang katungdanan si Bise Presidente Sara Duterte.