EDITORYAL - Rice retailers angay pitulon

Daghan pa gihapong mga rice retailers ang padayung nagbaligya og bugas nga sobra P55 ang kada kilo bisan pa man gipaubsan na sa gobiyerno og 20-porsiyento ang taripa sa bugas sa tinguhang maka-afford ang publiko sa mga nindot nga klase sa bugas.

Sumala pa sa Department of Agriculture sa pagkakaron ilaha lang unang palabyon ang gibuhat sa mga rice retailers kay nangrason sila nga dugay na nila kining napalit sa mahal nga presyo.

Apan ang pangutana, kanus-a man kaha mahurot kining ilang “old stocks”? Wala diay sila mahalini sa nanglabay nga mga buwan? Unsa diay kadaghan ang ilang old stocks, usa, duha o tulo ka bodega, rice retailers ra man kaha ni sila?

Kun mao ni pirme ang irason sa mga rice retailers, aw dili gyud ni matuman ang P55 kada kilong bugas nga gustong ipatuman sa DA. Kay kun ang DA inspectors kutob lang pangutana, aw tubagon ra gyud sila kanunay og mga bakak sa mga bentahosong rice retailers.

Maayong ipasusi ang ilang mga resibo, kanus-a gipalit ug pila ka sako, dayon kwentahon pila ka kilo o sako ang average nga mahurot kada adlaw sa ilang mga baligya, mabana-bana gyud kun hangtud kanus-a mahurot ang ilang old stocks.

Kun masakpan gani nga namakak sila, maayong sampolan og administratibang silot ang rice retailers pinaagi sa tabang sa Department of Trade and Industry ug Local Government Unit diin sila nasakop aron makamulta o ba kaha ma-rebukar ang business permit tungod sa pagpanglimbong.

Gipakubsan sa DA og 20 porsiyento ang taripa tungod nibarato na karon ang bugas sa world market.

Gipaabot nga karong Pebrero 15, 2025 ang suggested retail price sa tanang klase sa bugas dili na molapas pa og P55 sumala pa sa DA tungod kay mga bag-o na ang tanang stocks, local man o imported.

Gani gibutyag ni Agriculture Secretary Francisco Tiu Laurel Jr. nga posibleng mokubos pa gyud kini hangtud P49 kada kilo sa sunod buwan, Marso.

Layo pa kaayo kini sa gisaad ni Presidente Ferdinand Marcos Jr. atol sa iyang kampanya nga paninguhaon niyang mahimo nalang nga tag P25 kada kilo sa bugas. Sinugdanan na ba ni?