EDITORYAL - Troll farms napud?

Panahon na sab karon sa eleksyon. Karon daghan ng makita nga mga campaign posters sa nagkadaiyang mga kandidato, lokal man o nasyonal nga mga politiko. Bisan asa, gipapilit ilang mga dagway bisan sa mga lugar nga bawal sama sa mga punoan sa kahoy.

Apan dili lang sa mga kadalanan makita karon kining gibalandra nilang mga dagway, naa gyud mismo sa atong mga balay o bulsa. Kini pinaagi sa atong mga cellphones nga konektado sa social media.

Niadtong tuig 2013, naobserbahan ang grabeng engagement sa mga Pilipino sa social media.

Adtong mga panahona barato na kaayo ang mga android phones mao nga halos tanan sugtong makabaton niini, dili pang komunikasyon lang kondili pang social media sab.

Karon makita na sab og balik diha sa social media, partikular sa Facebook, TikTok ug Instagram ang nagkadaiyang mga posts mahitungod sa mga politiko, mga kandidato ug uban pa.

Kaniadto halos mapuno ang timelines sa mga indibidwal nga accounts sa FB og mga post bahin sa mga politiko, apil na niini ang mga pagpangdaut sa mga politiko, pagpahumot sa politiko, pagpakatap og mga fake news, misinformation, disinformation ug uban pa.

Hinuon dili pa sama kadaghan ang mga political posts sa miaging 2013 sa dihang naghinangat ang 2016 local and national elections. Tungod tingali kay wala na kaayoy troll farms nga gidudahang naka-impluwensiya gyud sa resulta sa piniliay human sila gipaimbestigar?

O tungod ba kaha pud kay wala nay Philippine Offshore Gaming Operations (POGO) nga hingpit nga gipa ban dinhi sa nasud.

Ang POGO gawas nga gidudahang nalambigit sa mga krimen, scamming, tinubdan sa kinilong ilegal nga drugas ug ning bag-o, front sa pagpangespiya sa China,  gidudahang sab sila kaniadto nga maoy nagpaluyo aning mga troll farms nga gimugna aron pahumoton ang usa ka kandidato ug dauton ang labing lig-on nilang karibal.

Magmatngon na unta ang mga Pilipino aning mga posts sa social media, nga ang mga unod ug mensahe, pang-kondisyon sa hunahuna sa mga tawo aron sila impluwensiyahan ang ilang hunahuna atol unya sa eleksyon.

Dili kini maayo, dili gyud unta diktaran ang katawhan sa ilang pagbotar kay dili kini makaayo sa Pilipinas.