Lipatlipat ni Romualdez
Nagpadayong lipatlipat sa liderato sa House of Representatives parte sa impeachment ni Bise Presidente Sara Duterte. Nanagana si House Speaker Martin Romualdez paglihok sa tulo ka napasakang impeachment complaints kay:
Sayon rang makuha ang numero sa impeachment (labing menos 103 ka kongresista) aron direktang mapadala ang articles of impeachment ngadto sa Senado; pero
Dili masukwahi ang gibalikbalik nga deklarasyon ni Presidente Ferdinand Marcos Jr. nga dili makaayo ug dili tukma ang higayon sa impeachment; pero
Dili mahimong ibasura ang impeachment nga gisuportahan sa 28 milyones (41% sa rehistradong mga botante).
* * *
Samtang lisod sungayon ang popularidad sa bise presidente, labi na human sa nasudnong protesta sa Iglesia ni Cristo (INC) pagsupak sa impeachment, mas lisod ipasabot nilang Romualdez ug mga kongresista ang pag-isnab sa impeachment complaints, nga kapin sa duha ka buwan nang natanggong ug pulos gipasikad sa mga ebidensiya sa mga anomaliya sa confidential funds ni Duterte.
Wala nay motuo sa mga imbestigasyon sa House of Representatives kon igo lang silang molikoy. Imbes motiwas sa pagpaningil sa mga nasakpan nga nakalapas sa mga balaod.
* * *
Maong ilang gilawog sa tirong si House Secretary General Reginald Velasco kay mas sayon rang tulisukon. Mahimo ganing taktakon kon dasonan sa mas daghang grupo ang pasangil nga gilapas ang lagda sa House nga nagsugo niya pagpadala dayon ngadto sa speaker sa madawat nga impeachment complaint.
Pero nahibawo tang tanan nga dili pagbuot ni Velasco ang pagyaka. Napugos lang pagpanagang nga wala itakda sa konstitusyon pila ka adlaw nga magpabilin sa iyang upisina ang impeachment complaints.
* * *
Subaya ang mga palusot ni Velasco nga nagsimbolo sa kabakikaw sa kalit nga pagtak-om sa mga kongresista human maisugon nga nipasidaan sa pagpaningil sa bise presidente:
Wala dayon i-transmit ang impeachment complaints nga gi-verify pa sa legal department sa House;
Gilangay pag-transmit kay dunay 10-12 ka kongresista nga nangayo og panahon sa pagtimbang-timbang mo-endorse ba o mopasaka og laing kaso;
Gisaad nga i-transmit niadtong Huwebes, Enero 30, kon walay mapasaka nga ikaupat nga impeachment complaint; ug
Karon na gyong semanaha i-transmit kay duna pay igong panahon sa pagpirma sa 103 ka kongresista aron ma-impeach sa House ug husayon si Duterte sa Senado.
* * *
- Latest
