EDITORYAL - Nataktak nga POGO workers hain na?

Daghan pa gihapong mga nangawad-an og trabaho nga kanhi empleyado sa mga gipangsiradohang Internet Gaming Licensees (IGLs) ug sa mga Philippine Offshore Gaming Operations (POGO) ang padayung walay mga trabaho.

Base sa rekord sa Department of Labor and Employment (DOLE) dunay 18,000 ka mga POGO ug IGL workers nga nawad-an og trabaho human gimando ni Presidente Ferdinand Marcos Jr. ang pag-ban niini sa nasud tungod sa mga krimin nga nahitabo nga konektado sa ilang mga operasyon.

Ang POGO ug IGLs gipadagan og mga Chinese gambling lords nga matud pa namiktima pud og ilang mga kababayan didto sa China ug ubang parte sa Asya.

Mura sila og mga uhong nga nanglugwa sa mga nagkadaiyang mga lugar sa nasud apil na gani sa mga suok nga mga resorts.

Ning bag-o, ang DOLE nipahigayon og  duha ka adlaw nga Career Con 2025 job fair sa Pasay City alang sa 18,000 ka bakanteng mga posisyon sa nagkalainlaing trabaho nga gipangita sa 150 ka mga niapil nga mga kompanya.

Giimbitar ang 18,000 ka mga kaniadto na-displaced nga mga empleyado apan mtud pa 8,000 lang ang nitungha ug ni-apply, apan 100 lang ang na hire on the spot sumala pa sa DOLE.

Posible sab nga wala silay skills nga maoy gipangita sa mga employers, kay kun sa POGO, ang numero unong skills nga kinahanglang naa mao ang makamaong mo-English aron magkasinabot sa ilang mga agalong Chinese.

Ang mga rason nila, gamay ra ang sweldo, ang uban duna nay trabaho ug ang kadaghanan pabiling malaumon nga mobalik ang operasyon sa POGO dinhi sa Pilipinas.

Sigurado nga dagko gyud ang ilang sweldo kaniadto nga dili mahatag aning mga kompanyaha nga nangita og bag-ong mga empleyado.

Tingali kinahanglan sa DOLE maghimo og laing mga programa nga mas daghan sa mga nawad-an og trabaho nga mapun-an ang ilang skills aron sila madawat sa ilang pagpangita og trabaho. Pwede ra gyud ang mga trainings ug ingon man pag-agni kanila nga mosuway og negosyo apan kinahanglang tabangan nga makakita og puhonan.