"Wa bantay tindahan"

Namahayag si Presidente Marcos, Jr., nga “manira ang tibuok gobiyerno” kon ugaling paboran sa Korte Suprema ang mga petitioner ni’ng ilang pag-kwestiyon sa constitutionality sa 2025 General Appropriations Act (GAA).  Nagtuo usab ang presidente nga kabahin sa destabilisasyon ang pagkwestiyon sa 2025 budget.  Dili tingale hingpit nga tinuod ang pamahayag sa presidente tungod kay aduna ma’y giingon nga “re-enacted budget” kon ugaling makonsiderar nga inbalido ang kasamtangan’g budget.  Kaha kon wala nay motrabaho, mao kana’y higayon nga manira gyud ang gobyerno.  Niana’ng kahimtanga, haum ang giingon sa negosyante’ng intsik, “Silado mi kay wa bantay tindahan.”  Pagkatoytoy!

 Pakyas nga mga saad

Kusganon’g gisaway ni Dr. Tony Leachon, usa ka health reform advocate, ang kahimtang sa health care reform karon sa Pilipinas.  Matud pa ni Leachon, dako kaayo ang gintang sa saad sa gobyerno  kon itandi sa aktuwal nga implementasyon sa universal health care ug pagpatuman sa mga polisiya nga may kalabotan sa panglawas.  Adunay punto ang pagpanaway ni Dr. Leachon kon basehan nato ang pag-divert sa pundo nga alang unta sa mga programa sa panglawas ngadto sa laing katuyoan.  Mao kana’y giingon nga, “Ang health care system sa Pilipinas dili nato matawag nga “healthy”, o “caring” ug labaw na nga walay sistema.”  Muleeng!

Abilidad sa politiko

Giawhag sa Federation of Free Farmers (FFF) ingon man sa Magsasaka party-list (MPL) ang kongreso nga ipatawag ang mga economic managers sa nasud aron ilang mapasabot kon ngano nga nagpabilin’g taas ang presyo sa bugas.  Mahinumduman nga masaligon’g mirekomendar ang mga economic managers nga konhuran ang taripa sa bugas, pinaagi sa pagluwat sa E.O. Number 62, aron mokunhod usab ang presyo niini.  Ni’ng maong kapalpakan, haum ang panahom nga, “Ang politiko adunay abilidad sa pagtag-an kon unsay mahitabo sa umaabot ug labaw pa’ng may abilidad sa pagpasabot kon ngano nga wala mahitabo ang iyang panag-an.”  Atala lagee!

Pasmo ang musikero

Segun sa pagtuon nga gihimo sa National Research Council of the Philippines (NCRP), nasayran nga ang mga Pinoy mogahin og  mokabat 126 minutos aron lang pagpaminaw og musika.  Apan bisan pa niini, nasayran usab nga ang mga musikero ug kadtong nagtrabaho sa music industry maoy labing menos ang kita nga dili gani moabot og P20,000 matag bulan.  Tinuod nga wala matugbangi ang kahago sa musikero kon bayad na sa ilang talento ang hisgutan.  Matud pa sa akong amigo, “Dili gyud mo-asenso ang mga musikero kay moingon man gud sila nga ‘Mosugot ra mi’g dili bayran, basta pakpakan lang’.”  Madahaan!

Tubod sa ayuda

Gikataho nga adunay 16 ka gobernador sa nagkalain-laing rehiyon sa Visayas ang milagda og manifesto nga nagpadayag sa ilang suporta kang Presidente Marcos, Jr., ingon man sa iyang panglantaw alang sa nasudnon’g kalamboan.  Ang paglagda gihimo atol sa unity lunch nga gi-organisar ni Cebu Governor Gwendolyn Garcia.  Dili na kini ikahibulong.  Gikinahanglan usab sa mga politiko ang suporta sa presidente labi na kay nagsingabot ang eleksyon.  Mao kana’y giingon nga, “Kon asa ang tubod, adto gyud kita mosalod.”  Fezteleern!