EDITORYAL — Ayuda napolitika

Nagsagunson karon ang pagpanghatag sa ayuda gikan sa gobiyerno para sa nagkalain-laing mga hugpong sa katilingban, gikan sa senior citizens, PWDs ug hasta pud mga biktima sa sunog ug katalagman.

Daghan ang nalipay ilabi na sa mga nagkinahanglan gyud niini ug angayan gyud tabangan sa gobiyerno tungod wala na silay laing pangita tungod sa ilang edad o ba kaha sa ilang panglawas, samtang dako sab kini og matabang sa mga biktima sa mga katalagman para sila makabangon pagbalik.

Ang Department of Social Welfare and Development (DSWD) mao ang ahensiya sa gobiyerno nga gitahasan para sa pagtabang sa mga nangkinahanglan. Mao nga duna kini dakong pundo gikan mismo sa nasudnong gobiyerno .

Gawas sa DSWD naa sab ang mga local government units nga tighatagan sab og ayuda apan pinasubay kini sa ordinansa.

Apan subo lang usahay atol nga manghatag og ayuda ang DSWD naa man say mga “kuyog-baboy” nga mga politiko.

Mura og sa ilahang bulsa gikan ang ayuda kay dagko kaayo og dalang posters nga nag-ingong sila matinabangon ug naghunahuna sa mga benepisaryo.

Magapil-apil ug mamulong pa gyud diha sa entablado, samtang tuod wala sila direktang nangampanya sa ilang kaugalingon, ang ilahang presensiya sa kalihokan ug sa kasamtangang panahon karon nga hapit na ang eleksyon makaduda ilang motibo.

Hinuon sukad nga nabaniog kini sa media medyo mikalma kini og kadiyot, apan ning nagsingabot na sab ang mid-term elections sa sunod tuig, balik na pud ning mga politiko sa ilang gawi.

Tungod niini, kaning tinarong nga serbisyo sa DSWD sa mga nagkinahanglan usahay dili malikayan nga madudahan sa uban nga gigamit na nga pagpanuhol sa mga politiko ang ayuda ngadto sa mga benepisaryo mga botante sab.