Kon wala kang kabantay, nagpaugatay silang Bise Presidente Sara Duterte Carpio ug House Speaker Martin Romualdez sa budget sa Office of the Vice President (OVP) sa 2025. Wala unta mosangko sa kataposang gutlo kon:
Gituman ni Carpio ang iyang trabaho ubos sa 1987 Constitution pagpanalipod sa budget o, kon dili siyang kamao o kon tapolan nga magtuon, nipadala og mga representante nga makapasabot sa nangagi ug umaabot nilang mga gasto; ug
Gipasar o gilaslasan dayon sa mga kongresista ang OVP budget base sa mga dokumento nga gisumiter na sa OVP.
* * *
Pero nagpatuyang si Carpio sa iyang gibati. Ambot gibadlong ba ug wala mopatuo. O gidasig pagkopya sa iyang amahan nga nilaktaw sa mga institusyon ug direktang nipaukyab sa katawhan.
Nagsalig si Carpio nga dili kapamugos ang House pagsukitsukit niya. Sama nga mangahas ang mga kongresista sa pagsagpa og contempt ug pagpapriso niya. Labaw nang dili magpatuga-tuga, bisan sa awhag sa mga walhon, pag-impeach niya. Gawas nga gipasidan-an nga 32 milyones ang nibotar niya, apiki ang panahon kay mangampanya nang mga kongresista sa ilang mga distrito sugod sa sunod semana.
* * *
Human sa pasiunang kalibog unsaon pagbaraw ang pagbinastos ni Carpio nga dili siya makapasangil nga gidaugdaog sa administrasyon, nahukman sa kampo ni Romualdez nga imbes mangisog moduko ang House.
Gipatuyangan si Carpio sa wala pagtubag sa mga pangutana ug dayon pag-boykot sa Appropriations Committee ug sa wala pagpanumpa atubangan sa Good Government Committee. Gituyo pag-inat ang paghuwat mopakita ba sa una, ikaduha ug ikatulo ug kataposang adlaw sa plenaryo. Gipanghinaot nga igo nang hanig sa ilang paglaslas og sobra sa katunga sa OVP budget.
* * *
Giaprobahan sa House ang 2025 budget nga wala mapasabot ni Carpio ang binilyon ka pesos nga gi-disallow sa Commission on Audit (COA) sa iyang gasto sa OVP ug Department of Education (DepEd). Wala sab magtagad pagpasabot si Romualdez sa pasangil ni Carpio ug sa gidudahan sa mga magbubuhis nga siya ray nagmaniobra sa tinuig nga budget.
Kon wala pa kang kamatikod, ang linigwatay sa budget, sama sa kinatibuk-ang away sa mga Marcos ug mga Duterte, para ra nilang mga nag-ilog sa gahom. Walay labot ang katawhan kansang buhis ilang gikawkaw.
leolastimosa@gmail.com