Mga garbage truck gipang-clamped, basura nangalisngaw!

Nangalisngaw gyud ang kabaho sa mga basura nga gikarga sa mga garbage truck sa Barangay Mabolo sa dakbayan sa Sugbo dihang wala kini malabay ngadto sa labayanan tungod gi-clamped sa Road Managment Authority kon RMA nga kanhi Cebu Transportation Office ang ilang lima ka mga dump truck nga iya sa barangay. tungod sa overnight parking daplin sa karsada atubangan sa ilang baranggay complex.

Nangreklamo gyud intawon ang mga molupyo kay duol kini sa residential area, agianan sa mga bata nga moeskwela ug duna usay mga kan-anan samtang ang mahanggab sa mga tawo mora’g na sa landfil tungod sa mga nagpundo nga basura.

Nasayran nga nagsugod ang issue dihang nangayo og assistance ang barangay mismo ngadto sa RMA nga ipa-clamp ang mga pribadong sakyanan nga iya sa mga residente sa dapit ug ang naaasoy’ng dapit mao unta ang gamiton nga parking area sa mga sakyanan nga iya sa barangay.

Dihang nag-operate ang mga traffic enforcers unang gi-clamped ang mga gireklamong private vehicles apan mireklamo ang mga tag-iya kay pareho ra man sila og giparking sa mga sakyanan sa barangay nga naa sa daplin sa karsada.

Dinhi na napugos ang mga traffic enforcers sa pag-apil pag-clamped sa mga garbage truck sa barangay aron patas kay pareho man nga nakalapas sa lagda sa no overnight parking. Damay-damay lang, matud sa mga residente. Dili pud mabasol ang mga traffic enforcers kay lain man pud kaayo tan-awon nga kadtong mga sakyanan ra sa mga residente ang ilang i-clamp ug palabyon ra ang mga sakyanan nga iya sa baranggay.

Mora’g naunay sa tari ang Barangay Mabolo ani kay sila man ang unang nangayo og assitance sa RMA. Apan wala sila magdahum nga maamong pud ang ilang mga sakyanan sa basura nga gamit unta kaayo sa paglimpyo sa ilang mga hugaw. Sa panghitabo, naamong pud ang mga tawo apil na ang mga tag-iya sa mga sakyanan kay silang tanan nag-antos sa ka baho sa ilang mga basura kay nagpundo naman.

Sa ingon niini nga sitwasyon, silang tanan parehong naunay sa ilang mga gihimo. Makita nato nga walay labaw ni bisan kinsa kon ipatigbabaw lang gyud ang balaod nga angayan nga sundon. Kong moreklamo gani gani ka seguradohon nga dili ka maunay sama sa Barangay Mabolo. Samtang alang sa mga molupyo kong inyong iamong ang mga sakyanan nga gigamit sa basic services seguradohon nga dili mo maapektohan sa kabaho sa kaugalingon pud ninyong hugaw.

Maayo nalang kay nadala og hangyo ang RMA nga utangon lang ang multa nga P2,500 kada usa ka dumpt truck kay kong wala pa mag-antos gyud sa kabaho ang Barangay Mabolo kay dili man sila makadali dali sa pagpagawas og pundo nga ibayad sa multa kay wala man diha sa pagkakaron ang ilang kapitan.

Kining isyu sa Mabolo dili lang kini mahitungod sa basura. Duna pay mas lawon nga hinungdan niini kay mora’g gisakyanan na usab kini og pamolitika ug ang mga tawo na ang naapektohan. Angayang hinumduman nga dili lang sa mga naa sa katungdanan kon dili apil sa tanang mga molopyo nga magsinabtanay alang sa tunhaw nga pagpuyo sa katilingban diin sila nahisakop.