Sinugdanan na ba sa nasudnong kampanya?
Dungan sa pagbukas sa mga kalihukan sa ika-455 nga anibersaryo sa lalawigan sa Sugbo niadtong Lunes mitambong ang labing minus walo ka mga gobernador gikan sa ubang mga lalawigan sa Visayas ug, uban ni Cebu Gov. Gwen Garcia, mipirma sila sa usa ka manifesto nga nagpadayag sa hugtanong suporta sa administrasyon ni Presidente Bongbong Marcos ug sa mga polisiya niini alang sa Bagong Pilipinas.
Lakip sa mga mitambong mao silang Gov. Arthur Defensor, Jr. (Iloilo); Damian Mercado (Southern Leyte); Ben Evardone (Eastern Samar); Jake Villa (Siquijor); Joaquin Carlos “JC” Nava (Guimaras); Jose Enrique Miraflores (Aklan); Eugenio Jose “Bong” Lacson (Negros Occidental); ug Erico Aristotle Aumentado (Bohol).
Ang manifesto gidawat ni First Lady Liza Marcos nga mitambong sa kalihukan ug miapod-apod og mga mobile clinic ngadto sa mga mitambong nga gobernador.
Sa samang kalihukan, giduso sa mga gobernador ang “One Visayas Bloc” diin si Garcia maoy ilang gipiling mamahimo nilang lider. Sa tanang nahimo ni Garcia alang sa lalawigan sa Sugbo—giunsa niya pagpalambo og maayo ang lalawigan nga mamahimong numero uno sa tibuok nasud—dili ikahibulong kun pilion siya sa ubang mga gobernador nga mamahimo nilang lider.
Apan unsa bay buot ipasabot niini?
Gihulhogan kaha ang gobernador sa Sugbo sa iyang kauban nga mga gobernador nga ikonsiderar ang mas taas nga katungdanan? Ang paghulma sa One Visayas Bloc sinugdanan na kaha sa mas lapad ug nasudnong kampanya alang sa gobernador sa Sugbo sa 2025?
Sa bagay dili malalis ang katakos ni Garcia paghupot og mas taas nga pwesto sa kagamhanan. Ug kun hitupngan man, sigurado ko nga di hilabwan ang iyang abilidad ug dedikasyon sa serbisyo publiko.
Dugay na nga way senador ang Sugbo sukad nilang anhing Senador Sonny Osmeña ug kanhi Senador Serge Osmeña. Tingali panahon na sab nga dunay Sugboanon nga modala sa atong tingog didto sa Senado ug sigurado ko nga di ta mapakyas ug labaw na nga di mauwawan ang mga Sugboanon kun modisidir ang gobernador sa Sugbo nga palapdan ang iyang panerbisyo.
- Latest
