Insecurity sa bise president
Tungod sa suwat ni Bise Presidente Sara Duterte Carpio ngadto sa hepe sa Philippine National Police (PNP) nga si Heneral Rommel Francisco Marbil, nabalaka kong wa mag-inusara sa kakugang sa kadaghan diay sa mga guwardiya nga gi-destino sa gobyerno para sa ikaduhang labing taas nga opisyal sa nasud:
Akong nabasahan ang report sa Commission on Audit (COA) nga duna siyay 433 ka security escorts nga sakop sa ??Vice Presidential Security and Protection Group (VPSPG); nga
Labaw og 455% sa 78 ka military personnel para ni kanhi Bise Presidente Leni Robredo.
* * *
Pasayloa kon nasayop ko sa kalibog sa taas kaayong suwat sa bise presidente, pero ang akong nasabtan mao nga:
Gikuha ni Marbil ang 75 ka polis nga sakop sa Police Security and Protection Group (PSPG) nga nadestino sa Office of the Vice President (OVP); ug
Dunay 45 pa ka polis nga gibilin ni Marbil sa OVP.
120 ka sakop sa PSPG ang nadestino sa OVP? Puno ba ni sa 433 ka sakop sa VPSPG nga nasakpan sa COA? Sa ato pa, 533 ang tanang security escorts sa bise presidente?
* * *
Kon usa ka batalyon ang iyang mga guwardiya, di tingali ang bise presidente ang angay nga moreklamo. Kon dili ang mga magbubuhis nga maoy nag-suweldo niya ug sa iyang mga guwardiya.
Mao ba ni rason nga dugay kaayong makatubag ang mga polis sa mga alarma sa mga krimen batok sa ordinaryong mga molupyo?
Mao ba ni rason nga inutil ang kasundalohan sa pagpanalipod sa atong nasudnong seguridad gikan sa pagpanghasi sa China?
* * *
Kon usa ka batalyon ang seguridad sa bise presidente, pila man sab ka batalyon ang gipabantay sa presidente ug ubang mga opisyal sa gobyerno?
Kon nakuwangan ang bise presidente sa usa ka batalyon niya ka guwardiya, unsa man diay ang mga hulga nga iyang giatubang?
Hinaut nga may makahunghong nga walay makadupa niya kon ipatuman na sa Malakanyang ang arrest warrant sa International Criminal Court (ICC) batok niya ug sa iyang amahan; ug
Labaw nang way makapanalipod nila gikan sa hamok sa konsiyensiya tungod sa inosenteng mga kinabuhi nga giingon nga ilang giluba sa laktod nga pinatyanay sa Davao ug tibuok Pilipinas.
* * *
- Latest
