Walay "NO ID, NO ENTRY" sa mga simbahan

Laing panghitabo na usab sa dakbayan sa Sugbo ang nag-viral karon sa social media mahitungod sa usa ka transwoman nga magtutudlo nga nagbase na sa Taiwan dihang mipauli siya sa iyang yutang natawhan.

Nituyo gyud siya og adto sa Basilica Minore del Sto. Niño kay mopalit siya og imahen sa Balaang Bata kay iyang dad-on sa pagbalik niya sa Taiwan.

Apan dihang mosulod na unsa siya sa ganghaan sa Basilica gihatagan siya og tapis sa security guard kay basin og nag-short ba kaha ang ang naasoy'ng transwoman apan gipangayoan siya og ID busa nisibog siya kay wala man siya makadala og identification card apan iyang nahinumduman nga gidala niya ang iyang passport ug maoy iyang gipakira sa mga sekyu ug usa ka policewoman. Dinhi na nahitabo ang tensiyon kay base sa video murag wala i-honor sa pulis ug sa mga guard ang iyang passport.

Klarohon lang nato daan nga ang wala mo-require ang simbahan og ID sa mga mosulod sa simbahan apan gikinahanglan kini kong migamit og tapis ang churchgoer aron segurado nga mauli ang tapis nga panahon inig mogawas na ang nakigamit sa tapis nga panapton.

Kining isyuha walay kalambigitan ang kaparian sa basilica kay in fairness nila welcome ang tanan nga mosulod apan gikinahanglan nga mo-observe sa mga patakaran sanglit templo sa Dios ang dapit ug kini balaan.

Apan ang issue niini ang wala magkasinabtanay. Siguro ang mga gwardiya naanad nga literal nga ID gyud ang ipresentar, apan naay usa ka policewoman nga ni-intervene ug nakapasamot sa tensiyon kay gikutikuti man niini ang passport seguro gipaneguro niini kong ang churchgoer ba ang naa gyud sa passport, gani madungog sa video ang mga pulong nga unsay nakabutang nga data sa passport ug nitubag ang churchgoer nga male siya.

Mubo ra kaayo ang video nga na-upload sa hingtungdan, apan sa iyang mga post gipadayag niini ang iyang kadismaya sa iyang experience kay usa siya ka lumad nga Sugboanon apan giingon siya niadto og tratar, samtang ang dunay mga foreigner sayon ra man nakasulod sa simbahan.

Karong adlawa akong kuhaan og habig ang mga nalambigit nga security guards apil na ang policewoman ug mismo ang kadagkoan sa Basilida ug ang Cebu City Police Office mahitungod niining isyuha.

Apan kong tinuod man nga wala gyud ilha sa nagbantay sa ganghaan sa simbahan ang passport, mao kini ang dakong isyu kay nagpakita lang kini sa kakuwang sa kaalam sa uban pag-ila kong unsa ang mga dokumento nga angayang dawaton. Ang passport mas labaw pa gani na sa ID kay mao kini ang gamiton sa pagsulod gawas sa ubang nasod, ug sa simbahan na hinoon dili pwede? Pagkapastilan nalang gyud.

Sa habig sa mga nagbantay sa ganghaan sa simbahan igo ra sila naghimo sa ilang trabaho. Apan gikinahanglan ang maayo nga pagtratar nila sa mga tawo, pasabton og tarong kong aduna may ipatuman nga lagda, ug labaw sa tanan kahibawo sila sa ilang trabaho, pulis ra ang usa nga angayan unta siya ang mopasabot sa mga security guards nga valid ang passport nga maoy ipabilin aron maseguro nga mauli ang tapis nga gihulman, siya naman hinuon ang hinungdan nga misamot ang tensyon.

Sa mga tawo nga wala pud masayod sa tinuod nga issue diretso dayon og birada sa simbahan nganong no ID no entry,l. Sa akong giingon nga bisan asa nga establismento kong duna kay gamiton nga butang gikinahanglan nga modeposito ka sa id aron seguradong mabalik ang butang.

Samtang sa mga tawo gustong mosulod sa mga balaan nga dapit sama sa simbahan, nasayod na kita sa mga lagda nga duna gyuy dress code nga angayang tumanon aron walay sabod ang atong pagsulod.

Sa paggikan pa lang nato sa atong balay unya puntarya nato ang simbahan magsul-ob kita og mga sapot nga haum sa atong giadtoan nga dili na kinahanglan nga mogamit pa kita og panapton nga itapis sa parte sa lawas na revealing kaayo.