Wala dawata sa kaugalingong lungsod

Hulyo 7, 2024: Ikanapulog-upat nga Domingo sulod sa tuig

Mga Pagbasa: Ez. 2;2-5/Sal. 123/2Cor. 12;7-10/Mk. 6;1-6

MAAYONG BALITA

Daghang mga milagro nga nahimo sa atong Ginoong Jesus ug daghan ang nipatalinghog sa iyang mga pagtulon-an.

Ang tanan dunay pagtuo kaniya, gawas lamang sa iyang kaugalingong lungsod. Duna silay pagduhaduha sa iyang katakos. Kay unsa ra gud siya? Anak sa Panday? Walay pormal nga edukasyon? Gumikan niini, walay nahimong daghang mga milagro gawas niadtong pagtapion lamang sa kamot sa pipila ka masakiton. Gitataw ni Jesus nga walay propeta nga dawaton sa iyang kaugalingong lungsod.

KASINATIAN

Duhay duha ka butang ang posibleng mahitabo kun anaa ka sa imong kaugalingong teritoryo o lugar. Una, suheto ka ug busa dili na kinahanglang mag-adjust. Ikaduha, mahimong dili kaayo ka kalihok sa imong pagkamamugnaon sanglit santaon kaman sa mga batikos kay sayud man ang kadaghanan sa imong kagikan ug sa imong kahimtang. Sama sa atong Ginoong Jesus ikaw usab mahimong makadawat sa imong kaugalingong bahin sa pagsalikway kun rejection. Ang sakit pa gyud niini, mismo ang imong kaugalingong pamilya ang mohimo man sa ingon.

LIHOK

Sa panahon nga ikaw i-reject o isalikway batoni ang kaisog ug kalig-on kay matud pa ni San Juan Maria Vianey ang Ginoo ingon man ang mga Santos mao man ang imong audience. Ngano man diay ug wala ka dawata sa mga tawo anaa man ang Dios nga mosapupo kanimo busa padayon!

PANGAMUYO

Ginoo hatagi ko og kalig-on sa pagtuman sa imong kabubut-on bisan pa man kun isalikway ako, sayud ako nga anaa ikaw nga padayong mosabot, modawat ug mohangop Kanako. Sayud ka sa akong pagka ako ug salama sa imong gugma ug pag-amoma. Ikaw nga buhi ug hari hangtud sa kahangturan. Amen.