Kong maulipon na gani sa bisyo ang tawo maguba gyud ang tanan nga iyang gipaningkamotan kay makalimtan naman niya kini tungod sa iyang pagkabuang sa bisyo.
Sama nalang niining usa ka pulis didto sa dakbayan sa Toledo nga nanulis sa usa ka kooperatiba diin nakuhaan og CCTV sa sulod sa establisemento ug ang iyang pagsibat sakay sa iyang motor.
Ang iyang dautang binuhatan dali ra kaayong nasakpan ug siya natanggong sa bilanggoan. Pastilan giunsa man intawon niya og hunahuna nga siya usa ka tigpanalipod sa katawhan siya naman hinuon ang niunay sa pagpasipala sa mga tawo nga gitugyan kaniya ang seguridad.
Anugon kaayo ang iyang paningkamot, apil na ang pangindahay sa iyang pamilya nga nisalig kaniya ug mismo ang pagsalig sa mga tawo nga iyang giguba tungod kay natintal siya sa kwarta.
Katarongan ra niining pulis nga pamilyado siya busa gikinahanglan nga suportahan niya ang panginahanglan niini. Dako na baya og sweldo ang pulis karon bisan kadtong bag-o pa sa serbisyo nga igo ra gyud makahatag og desenting pagpuyo sa iyang pamilya.
Apan tungod lagi kay nisulod sa bisyo, dili na maigo ang iyang sweldo, nagumon man kuno kini sa online sugal nga maoy nakapahimo niyang ungo sa kwarta, wala ug too ang utang nga dili na makabayad tungod sa kadako. Gidugangan pa sa bisyo sa babaye nga hatagan kuno niya og motor ang iyang kerida. Kay walay igong kwarta nagmarka bahala nalang sa pagpanulis.
Kining matang sa pagkatawo nga dili angayan hatagan og pagsalig, ang iyang position isip miembro sa Philippine National Police usa ka dakong responsibilidad nga angayang hatagan niya og respeto human siya dawata niini sa serbisyo.
Makaamong ang iyang gihimo sa ubang mga pulis nga nagtinarong sa serbisyo nga mapagan sa mahukmanon nga kinaiya sa mga tawo.
Kanunay na sila gipahimangnoan nga dili mohimo og ingon niini nga mga butang apan tungod lagi kay nagpadaug sila sa yawa, aw nayawa sad gyud ang ilang pagkatawo.
Bisan unsa seguro nga programa nga himoon sa ilang organisasyon kon ang ilang sakop ang molikoy dili gyud kini molampos.
Ang nahitabo niining pulisa mamahimong sumbanan sa iyang mga kaubanan nga kong magpadayon sa ilang bisyo aw mahiadto gyud sila sa angayan nilang padulngan, ang bilanggoan.