Miapil na ang gobiyerno sa Amerika sa pagpanawagan sa mga otoridad sa Pilipinas nga mahatag ang hustisya sa pagpatay sa trade union leader ug miyembro sa LGBTQ+ sa Bacolod City Alex Dolorosa niadtong Abril 27,2023.
Si Dolorosa maoy organizer sa BPO union didto sa maong siyudad. Ang pagpatay kaniya nahitabo upat ka adlaw sa wala pa ang pagtimaan sa Labor Day niadtong Mayo 1. Ang pagpatay kang Dolorosa nagpalig-on sa bansag o reputasyon sa Pilipinas nga usa sa labing peligrong lugar para sa mga mag-organisar og mga kahugpongan sa mga mamumuo, sunod sa propesyon sa mga tigbalita.
Sa usa ka talagsaong panghitabo nakigduyog ang Amerika sa mga panawagan dinhi sa nasud ug sa international human rights groups nga nanawagan og hustisya para kang Dolorosa.
Una nang gikondenar sa gobiyerno sa Pilipinas ang pagpatay kang Dolorosa ug mimando sa PNP ug NBI sa paghimo og imbestigasyon ug pangitaon ang mga nalambigit sa pagpatay sa union leader.
Kun nahitabo kini sa panahon sa administrasyong Duterte, siguradong tawgon ang gihimo sa Amerika nga usa ka matang sa pagpanghilabot ug panginsulto sa kagawasan sa Pilipinas.
Apan sukwahi sa nakalabay nga administrasyon, ang kasamtangang lider nga si Presidente Ferdinand Marcos Jr. mipadayag ng daan nga ubos sa iyang pamunoan siguraduhon niining tahuron ang tawhanong katungod sa tanan. Nakigsuod sab kini og balik sa Amerika nga tradisyonal sa Pilipinas nga kaalyado sa halos tanang butang. Ang amahan ni Marcos mao si kanhi presidente ug diktador Ferdinand Marcos ug ang gobiyerno niini giakusahan og daghang paglapas sa tawhanong katungod ubos sa Martial Law. Ang gibuhat sa Amerika dili kini angayang isipon nga pagpanghilabot kondili natural lamang nga reaksyon isip usa ka nasud nga nagtamod ug nagprotihir sa tawhanong katungod para sa tanan.
Usa kini sa mga nindot nga hiyas ug mithion sa mga demokratikanhong nasud nga naghatag og kagawasan sa katawhan niini nga makapadayag sa ilang mga gibati ug yangungo. Ang panawagan og hustisya nagagikan sab sa Communications Workers of America ug Human Rights Watch uban sa mga labor groups sa nasud.
Dili kini pagpanghilabot kondili panawagan ngadto sa mga otoridad nga protektahan ang katungod sa mga mamumuo ug sa mga lider sa mga union.