Kalbaryo na

Nagsugod na ang kalbaryo ni Kongresista Arnolfo Teves kay gihukman sa tanang mga sakop sa Kongreso nga suspensohon siya sa iyang pagka magbabalaod sulod sa 60 ka adlaw.

Ang rason tungod kay nakalapas si Teves sa ilang lagda nga mipalta sa iyang katungdanan nga way “approved leave of absence” ug hangtud karon way tinguha nga mobalik.

Gitugotan si Teves nga makaadto sa United States apan kinahanglang mobalik na unta siya niadtong Marso 9, apan wala man mobalik kay nahadlok nga basin og patyon siya.

Si Teves maoy gidudahan nga mastermind sa pagpatay ni Negros Oriental Governor Roel Degamo kay ang mga kanhi sundalo nga nadakpan, mitudlo man niya nga maoy nagsugo.

Bisan si Presidente Bongbong Marcos miawhag ni Teves nga mobalik na sa nasud ug atubangon ang iyang kaso. Gipasaligan ni Bongbong si Teves og proteksyon, apan hadlok gihapon si Teves.

Nakapanglantaw ko nga moabot ang higayon nga ang National Bureau of Investigation (NBI) mopasaka ra gyud og kaso batok ni Teves base sa pamahayag sa mga dinakpan.

Kon kini mahitabo, mosamot ang problema ni Teves ug posibleng magtago-tago na lang gyud siya sa laing nasud. Maayo nga mentras sayo pa, mouli siya ug tubagon ang pasangil.

* * *

Naproblema tawon ang MCWD kay ang backhoe sa ilang kontraktor kanunay i-clamp sa Cebu City Transportation Office kay ang proyekto nila nga paglungag sa karsada way permit.

Unsaon man sab gud nga kining JFAP Construction nga gikontrata sa MCWD sa paglubong og mga dagkong tubo sa tubig gikan sa Barangay Busay paingon sa Lahug, nagdanghag ra man.

Unya, lisud kaayo kontakon. Basta maglungag gani ta sa karsada, mangayo gyud ka og permit gikan sa DPWH, sa Cebu City Transportation Office ug sa Department of Engineering and Public Works, kon dia kini mahimutang sa Cebu City.

Grabeng sakripisyo ang nahatag niining JFAP Construction ngadto sa publiko kay ang ilang trabaho milapas na lang sa tuig nga wa pa mahuman.

Tungod sa ilang palpak, ang laing kontraktor sa water project sa MCWD nga mao ang JE Hydro Bio-Energy Corporation apil tawon nga nasakripisyo.

Ang JE Hydro maoy kontraktor sa MCWD nga modala sa tubig gikan sa Barangay Lusaran paingon diha sa Barangay Busay. Nahuman ang proyekto nila wa abti’g tuig bisan nga ang Lusaran 25 kilometros gikan sa Busay.

Ang proyekto sa JFAP Construction gikan sa Busay paingon sa Lahug 2.7 kilometers ra. Ang JFAP gikontrata sa MCWD og P115 milyones, samtang ang JE Hydro way nausik nga kwarta sa MCWD kay ang tubig ra man ang ilang paliton.

Karon, unsa may mabaligya sa JE Hydro nga wa pa man makahuman ang JFAP Construction sa ilang gitrabaho?