Mas dako nga kasaypanan

Gi-relyebohan na sa iyang pwesto ang immigration officer nga mihimo og hataas ug makuti nga interview nga maoy hinungdan nga nabiyaan ang usa ka Pinay nga biyahedor sa iyang flight. Tataw ang pagka-garapal sa maniobra nga gipakita sa immigration officer. Ang pagbalhin lang sa maong kawani wala makasulbad sa problema hinunoa, nagbalhin lamang kini ngadto sa laing buhatan. Tinuod ang panahom nga, “Matag kasaypanan nga mabuhat sa empleyado, sulbaron kini sa gobiyerno pinaagi sa paghimo og susama o dako pa nga kasaypanan.” Fezteleern!

Misses na si mister

Giaprobahan na sa Kongreso sa ikatulo ug final reading ang House Bill 4605, ang balaodnon nga magtugot sa mga minyo nga babaye pag-gamit gihapon sa iyang apelyido sa pagka-dalaga ug dili na mapugos ang babaye pag-usab sa iyang apelyido. Ni’ng kahimtanga, sa adlaw sa kaminyoon pa lang, tataw na kon kinsa ang hawod sa magtiayon. Kon dili makapugos ang bana sa iyang asawa bisan sa pagpagamit sa iyang apelyido, labaw na nga dili siya makabuot-buot sa ubang desisyon sa panimalay. Basin baya moabot ang higayon nga ang bana na’y mogamit sa apelyido sa asawa ug ang bana na usab ang tawgon nga Misses. Pagkatoytoy!

Maka-kutaw sa sistema

Gi-justify sa Presidential Communications Office (PCO) ang hukom ni Presidente Marcos Jr. nga tugotan ang pagbaligya sa nasakmit nga smuggled nga asukal diha sa mga Kadiwa Centers sa tibuok nasud. Matud sa PCO, nahasubay ang maong hukom sa katuyoan sa Presidente nga mahimong barato ang presyo sa asukal. Wala man tingale angayan i-justify ang Malacanang ug labaw na nga dili na kini angay ibalita kay ang pagbuhat sa maayo alang sa katawhan katungdanan man sa kagamhanan. Haum ni’ng kahimtanga ang panahom nga, “Ang adlaw-adlaw nga balita karon, sama sa asukal, makapa-kutaw sa sistema sa atong kalawasan.” Muleeeng!

Manimahong basura

Nakakolekta og mokabat 97 metriko tonelada nga basura ang mga empleyado sa dakbayan sa Sugbo atol sa gipahigayon nga labing uwahi nga clean up drive sa kagamhanan. Tataw ni’ng kahimtanga ang atong kakulang sa disiplina ug pagpakabana. Ginaingon baya nga, “ang basura magpasad niadtong balay diin ang namuyo walay mga pangandoy.” Ang damgo nga mamahimo’ng Singapore-like ang dakbayan sa Sugbo, malisod kab-oton kon bisan sa paghipos sa atong basura, wala kita’y disiplina. Haum kanato ang panahom nga, “Sa kadugayan unya natong puyo uban sa basura, dili halayo ang panahon nga kita usab manimahong basura.” Madahaaan!

Dili tarong ang pangisip

Namahayag si Bise Presidente ug Education Secretary Sara Duterte nga mo-hire ang DepEd og dugang mga magtutudlo matag tuig isip kabahin sa basic education recovery program. Kinahanglan nga ubanan kining maong lakang sa pagbuhat usab og igong gidaghanon nga classrooms aron dili na kita makakita ug mga tinun- an nga klasehan ilawom sa kakahoyan. Sa kakulang sa pasilidad sa eskwelahan nga mahimong maka-apektar sa magtutudlo, basin baya makatuaw ang mga estudyante sa pag-ingon nga, “Malisod ang ang akong kasinatian pag-eskwela kay naka-agi ko og maestra nga dili tarong ang pangisip.” Fishkots!