Usa sa atong nakat-onan niining paghapak sa coronavirus disease o COVID-19 mao ang paghangop sa ka importante sa kanunay nga kalimpiyo sa pisikal nga aspeto sa kaugalingon.
Gani, kabahin sa pagkontrol sa pagkuyanap sa virus mao ang kanunay nga pahimangno sa kagamhanan alang sa sigeng paghinaw kon gikan sa gawas o gikan sa comfort room. Kini gawas usab sa panginahanglan sa kanunay nga pagsul-ob og facemask.
Apan ang labing maayong butang nga dala niining coronavirus mao ang sa natad sa kahusay ug kalinaw. Kini tungod lagi kay nahipos gayud ang kadaghanan kanato taliwala niining mga quarantine protocol nga gipatuman sa kagamhanan. Matud pa sa estatistika sa kapolisan, dako ang pagkahagba sa kaso sa kriminalidad dinhi sa Sugbo ug kinatibuk-ang Central Visayas sugod niadtong Marso hangtod karong panahona sa dihang miarangkada ang coronavirus disease.
Gani, dinhi sa Sugbo, atong namatikdan nga nimenos gayud ang mga kaso sa lungkab, snatching ug uban pang petty crimes. Hinuon, adunay mga nadakpan sa otoridad tungod sa gidiling druga, apan dili sama sa ka daghan sa niadtong wala pa ang quarantine.
Matud sa otoridad, dako og natabang ang stay at home order sa kagamhanan ug kapolisan ngadto sa katawhan pagminos sa krimen niining panahon sa community quarantine dinhi sa dakbayan ug lalawigan.
Aw kinsa bay dili mahadlok sa bangis nga virus nga misakdap karon sa tibuok kalibotan nga mitakod na og hapit 13 milyones ug mipatay na’g halos 600 ka libo. So nahipos gyud ang tanan bisan kadtong labing gahi nga kriminal.
Dako usab nga ikatabang ang gipakusgan nga police visibility sa Metro Cebu nga nakapakurog usab niadtong mga bugok sa katilingban. Hinuon, pqgkahuman na unya niining COVID-19, makapaabot kita nga mogimok na usab kining mga badlongon sa kadalanan.