Ang kamatayon sa duha ka bata nga giunay pag-ihaw sa ilang uyoan nga nawad-an sa maayo nga panghuna-huna didto sa Carcar kaniadtong Lunes sa gabii magsilbe unta nga leksyon sa katawhan nga magpabaya lang kun may sakop sa ilang pamilya o kaha silingan nga maburyong sa drugas.
Sagad sa mga tawo dili lang magpakabana kun may silingan sila o bisan paryente nga mopakita na og tilimad-on nga naliso na ang tuwerka sa iyang pangisip tungod sa pagsige’g gamit og gidiling matang sa drugas, sama sa shabu.
Ang managsuong dalagita nga nag-edad pa og 12-anyos ug 16-anyos, taga Sitio Canlawayon, Barangay Napo, Carcar napatay gayud diha-diha dayon human nga gikalitan pagluglog sa ilang uyoan ang ilang mga liog.
Laing igsuon sa duha ka biktima nakaangkon usab og mga samad ug gidala kini sa ospital. Kun gitagad pa unta sa ilang kabanayan ang uyoan sa mga bata diha nga nakabantay na sila nga wala kini sa maayong huna-huna, buhi pa unta ang mga bata.
Daghan kining mao nga sitwasyon diha sa atong palibot tungod kay mikatap na man pag-ayo ang shabu bisan sa labing hilit nga kabarangayan. Maghuwat pa ba kita nga ang nahitabo didto sa Carcar, mahitabo usab diha sa atong dapit?
Kun adunay mga tawo nga mamatikdan nga nagsugod na pagkayabag ang pangisip, kinahanglan kini nga itugyan dayon ngadto sa ospital ug dili kay maghuwat pa nga makahimo kini og krimen.
Bililhon ang kinabuhi sa tawo mao nga ayaw huwata nga kutloon lang kini sa mga tawo nga yabag na og panghuna-huna.