Ang mga skywalk gituyo sa pagtukod aron nga ang mga tawo nga molabang sa karsada dili mameligro nga madasmagan sa mga naghagiyos nga mga sakyanan.
Dili ikalimod nga dunay mga skywalk nga wala kaayo magamit tungod kay ang mga tawo kuwang og disiplina ug nga moderitso lang paglabang sa karsada.
Nindot og katuyoan ang kadagkoan sa Department of Public Works and Highways (DPWH) apan unsaon nga ang mga opisyal sa kabarangayan diin ang mga skywalk nahimutang walay gihimo aron pagpugos sa mga tawo nga mogamit sa skywalk.
Sa tanang skywalk, ang mga tanod ra sa Barangay Lahug maoy estrikto nga mipatuman nga ang mga tawo adto gayud nila paagion sa skywalk, ilabi na panahon sa tingsulod ug tingbuhi sa mga tinun-an sa Lahug Elementary School.
Ang ubang kabarangayan ilabi na ang Barangay Day-as nga duol kaayo gikan sa ilang barangay hall ang skywalk naghinan-aw lang nga ang mga tawo anha sa karsada maglakaw.
Gipanghatagan og dugang honoraryom sa City Hall ang mga opisyal sa kabarangayan apil ang mga tanod aron moabag sila sa pagpatuman sa balaod, apan ang kuwarta gisulod ra nila’s bulsa nga wala maghuna-huna unsaon nila pagtabang ang City Hall.