Natibhangan gayud ang kalipay sa mga senior citizen sa dakbayan sa Sugbo. Kini sa dihang mianunsiyo si Mayor Michael Rama nga mas ubos nga financial assistance ang madawat sa atong katigulangan karong tuiga.
Matud ni Rama, P6,000 lamang ang madawat sa mga senior citizen sa dakbayan karong tuiga. Kini sukwahi sa iyang gideklara atong nakalabay'ng tuig nga P12,000 ang madawat sa mga katigulangan.
Iyang gibasol ang konseho sa siyudad gumikan kuno sa pag-reduced niini sa 2014 budget sa dakbayan. Kini usab ang hinungdan ngano nga iyang sapsapan ang hinabang ngadto sa mga katigulangan.
Apan si Konsehal Margot Osmeña miingon nga ang proposed budget alang sa mga senior citizen wala man tibhangi sa konseho. Gumikan niini wala’y rason si Rama nga tibhangan ang hinabang sa mga katigulangan.
Tungod kay intact man ang budget sa mga senior citizens karong tuiga, nganong dili na man lang tinud-on sa mayor ang iyang gisaad? Dili ba alang man kanang gahin sa katigulangan?
Dili kaha mag- alburoto ang atong mga senior citizens niining lakang sa mayor sa dakbayan pagpul-ong sa ilang financial assistance? Dako kini nga posible ning panahon nga gikinahanglan nila ang salapi.
Siguro dako og kayugot si Rama sa konseho tungod sa pagputol sa iyang 2014 budget proposal. Kahinumdoman nga mayoridad sa konseho iyang kontra sa pulitika kinsa kanunay nga mobaraw sa iyang mga lakang.
Apan dili siguro angay madamay ang atong katigulangan. Tungod kay anaa na man ang gahin ug wala matibhangi sa konseho, angay lamang nga tumanon ni Rama ang iyang saad.
Lisod kini kun sakyan sa pulitika. Ug delikadong maunsiyami ang ambisyon sa mayor ug sa Team Rama sa sunod eleksiyon.