Kutob ra sa duaw
Dear Tito Miguel ,
Maayong adlaw , ako diay si Charisa Mae, taga Barangay Labangon ,Cebu City. Upat ka tuig nami sa akong uyab nga si Jay nga taga Liloan , Cebu . Hangtod karon, dili pa gyud siya ganahan nga mag-ipon mi og puyo bisan paman nga duna nami one year old nga anak. Ang iyang buhaton, moduaw ra siya nako ug sa among anak, matag day off niya sa iyang trabaho. Hinuon sakto raman ang iyang sustento. Klarohon lang nako, wala mi nagbuwag . Dili lang gyud siya ganahan nga mag-ipon mi og puyo. Wala pud siya mohatag og klaro nga rason. Unsa akong buhaton Tito Miguel ? Ganahan gyud ko nga mag-ipon mi,kay naa na baya mi anak. — Charisa Mae
* * *
Charisa Mae,
Usa ray pasabot ana, wala siya’y plano makigminyo kanimo o makig-ipon kanimo. Tagbaw ra siya nga naa moy anak, apan igo ra siya moduaw. Diha ra siya taman, para niya dili kinahanglan iyang presensiya, basta tibuok iyang sustento. Sa laktod, wala niya makita nga kanimo magmugna’g pamilya.
Wala siya’y gusto o plano, dili na kinahanglan ipamulong pa, ang iyang gibuhat ug wala buhata makabungog na. Ikaw na la’y sabot. Kay kun ganahan pa siya makig-ipon nimo, hagbay ra unta. Apan wala niya buhata, wala sab siya’y hisgot nganong dili mahimo. Apan ang problema kay gusto nimo mag-ipon na mo. Kani ang buhata, pangutan-a unsa iyang plano ninyo, duna ba kay mapaabot niya? Kun ingon paabot lang, pangutan-a unsa’y rason ngano dili mahimo karon. Kun dili mo-istorya, ayaw pugsa.
Sabta nga wala gyud siya’y plano. Kun mo-istorya apan wala’y klaro, ikaw na ang mopalayo, ingna dili ka gusto magpabilin sa relasyon nga wala’y kaugmaon. Kun dili ka gukdon, lagmit dugay na siya nagpaabot nga ikaw mismo ang makasabot.Kun gukdon ka’g mangamuyo, lagmit mahilis dayon ka, kay mao nay imong dugay na nga gipaabot. Apan pugong lang sa, angay ka mahibulong ngano diha pa siya naninuod nga mobiya na ka. Kay dili ba ang tiunay nga gugma kinahanglan sa adlaw adlaw pasaligan ka? Dili na mistil pangutan-on pa’g pangayoon ba. Tito Miguel
Magpatambag ka? Ipada kang Tito Miguel: 0991-318-9366
- Latest
