Makigbalik sa ex-gf

Dear Tito Miguel,

Ako diay si Ejay, taga Banawa, Guadalupe, Cebu City. Ganahan unta ko makigbalik sa akong ex-girlfriend nga si Regina nga nagpuyo rapud sa  susama nga barangay. Nagduha -duha ko og doul sa akong ex-girlfriend kay nakadungog ko og chika nga dunay nangulitawo kaniya karon. Suma pa sa akong source, guwapo kuno kaayo ang nanguyab niya karon ug wala ra kuno ko sa kumingking . Unsa imong ikasulti Tito Miguel. Angayan ba nga moatras nalang ko sa akong plano nga makigbalik kaniya? O pasagdan nalang nako nga maadto siya sa laing lalaki? Nagbuwag mi sauna tungod sa ka-busy namo sa usa'g usa,ug sinabotan namo ang among breakup. — Ejay

* * *

Ejay,

Kun ganahan pa ka niya’g nahigugma, suwayi lang. Basin diay dugay ra sad siya nagpaabot nimo. Kay dili ba ang rason nga nagbuwag mo kay wala mo’y oras sa usa’g-usa? Dili pa tungod kay ang usa nagbinuang nga mao’y rason kasagaran. Kamong duha deserving sa second chance.

Basin diay kun magbalik mo karon duna na mo’y time para sa usa’g-usa, mahatagan na ninyo’g prayoridad inyong relasyon. Kun mosugot ba siya, diha ra nimo matubag kun sa pakig-uli ikaw magpadayag. Kun wala kay buhaton, dili gyud nimo mahibaw-an. Magmahay unya ka sige’g pangutana unsa kaha kun gisuwayan lang nimo. Tutal, wala may mawala nimo. Single man kaha ka karon, libre ka manguyab niya’g balik.

Tingali nahadlok ka’g na-insecure nga dunay nanguyab niya nga layo ra nimo’g hitsura. Di kaha gibinuangan lang ka sa ni-istorya nimo? Diha ra nimo ni masusi kun moduol ka’g balik niya. Karon kon balibaran ka, at least natubag tanan nimong pangutana. Masakitan ka sa kapakyas, apan mas sakit kun imo mahibaw-an nga mosugot diay unta siya kun nangutana pa ka. Kun wala ka’y buhaton, moikyas ang higayon. Daghan na’g paagi pag-communicate karon, ang kuwang na lang imong hingpit nga desisyon.  — Tito Miguel

Magpatambag ka? Ipada kang Tito Miguel: 0991-318-9366