Dili magpakasal

Dear Tito Miguel,

Maayong adlaw, suki kay ko sa imong lindog kay ganahan gyud ko mobasa sa imong mga tambag. Ako diay si Lorena, taga Banawa, Guadalupe, Cebu City.  Duha ka tuig nami nga nag-ipon sa akong boyfriend nga si Rodel.   Wala sad gyud masulod sa among huna-huna nga magminyo. Susama mi og baruganan nga dili garantiya ang pagpakasal aron magdugay mi. Ang labing importante namo nga lig-on ang among panaghigugmaay.  Alang kanimo Tito Miguel, wala ra ba'y dautan sa among baruganan, or necessary gyud ang pagpakasal aron matawag nga lig-on gyud ang among panaghigugmaay? - Lorena-

* * *

Lorena,

Tinuod, wala’y garantiya sa relasyon ug gugma. Maski kasado pa mo, mahanaw gihapon ang tanan kun dili na magkasinabot labi na’g duna na’y pamakak, panlingla ug pagbudhi. Ka’y nagkasinabot man mo nga dili kinahanglan magpakasal, tagamtama ang unsay naa ninyo karon. Tagbaw ra man kaha mo, wala moy gibati nga kuwang o kahaw-ang, busa igo ra ang tanan. Usahay gani ini’g kasal na hinuon diha na magsugod ang problema sa kaminyoon.

Kun duna ma’y gamay nga pabor ang pagpakasal, tingali kay dili ing ana kadali ang pagbuwag kun duna ma’y problema. Posible maikog mo sa mga tawo nga nitambong sa kasal. Apan kun mao, para ra diay sa ubang tawo nga nagpabilin mo? Kadaghan sa gikasal, bongga pa kaayo, apan kalit lang ang usa nagduwa sa kalayo. Dili kini makapugong sa pagbinuang, kay ang kaligdong naa sa pagkatawo mismo, dili kontrolado sa usa ka seremonya ug papel.

Kun kumpleto pa inyong gibati sa sa inyong relasyon, dili kini angay usbon. Wala man kaha mo’y isyu sa relihiyon nga nagmando nga bawal ang pakig-ipon o pakighilawas kun dili pa kasado. Kun mao, pasagdi ang panahon kaninyo mohunghong. Ang inyong gugma sa usa’g usa ug tagsa tagsa nga kaligdong maoy makapalig-on sa inyong relasyon.-Tito Miguel-

Magpatambag ka? Ipada kang Tito Miguel: 0991-318-9366