Panagsa ra magkita

Dear Tito Miguel ,

Maayong adlaw, ako diay si Kristine ug suki gyud ko sa imong lindog. Problemado kay ko sa akong boyfriend nga si Carl.

Dili baya unta mi long distance relationship (LDR) apan panagsa ra gyud mi magkita . Nagpuyo ko sa Barangay Guadalupe , Cebu City , samtang siya kay taga Barangay Tisa , busa doul ra gyud mi sa usag-usa. Upat ka buwan na ang among relasyon. Ganahan siya nga usahay rami magkita kay aron daw ma-excite mi sa usa'g-usa inigkita namo. Laing rason niya kay dili siya ganahan nga maabot ang panahon nga mapul-an siya nako. Makapoul daw kun magsige og kita ug base na sa iyang kasinatian sa niagi niya nga karelasyon. Ako siya giingnan nga mas ganahan ko magkita mi permi kay dali rako mingawon niya. Apan dili gyud siya ganahan , dilli siya mosugot sa akong gusto. Unsaon nako pagkumbinser ang akong kaugalingon aron madawat nako ang iyang gusto ? —Kristine

Kristine,

Duna siya’y punto. Tinuod, sum-ol na kung adlaw -adlaw mo magkita, wala na’y hinangpon. Labi na ka’y mao na’y nahitabo sa iyang niagi nga relasyon. Apan sa imong bahin, mingawon dayon ka niya. Wala’y dautan, mao bitaw nag-uyab mo aron makuyog ninyo ang usa’g usa. Wala’y sayop ninyong duha, wala lang nag-abot inyong kahidlaw ug kamingaw sa usa’g usa. Busa pasagdi siya. Apan ingna ganahan unta ka adlaw adlaw mo magkita, apan mag-agad lang ka niya isip respeto sa iyang personal space. Kay kun mangaway ka’g mangluod kun dili siya magpakita, lagmit mapugos lang siya. Total, upat ka buwan pa man mo, naa pa mo sa estado nga mag-ilhanay sa inyong tagsa tagsa nga pagkatawo. Ayaw pagdali.

Apan paniid, ka’y kun dili mapun-an iyang oras kanimo samtang nagkadugay mo, basin mas kumportable siya’g layo mo sa usa’g usa. Buot pasabot iyang gusto ug gugma kanimo wala ni level-up. Diha ra mo taman. Kun wala’y kausaban o dili ba kaha iyang panahon kanimo magkahilis, angay na ka magduha -duha. Kay dili ba nisulod ka sa relasyon sa pamasin nga siya imong maminyoan? Kun dili siya ganahan magkita mo adlaw- adlaw, unsaon na lang kun kasado na mo, mora na siya’g piniriso?

Ang tawo nga kanimo hingpit nagmahal, dili mahimutang kun wala ka sa iyang kiliran. Mahadlok man gani makakita ka’g lain samtang wala siya. Busa paniid lang usa, hatagi siya’g igong panahon nga makaamgo asa ka dapit sa iyang kasingkasing. Tito Miguel

Magpatambag ka? Ipada kang Tito Miguel: 0991-318-9366