Kun labayon ka’g bato, baslig pan. Kun sagpaon ka sa tuo mong aping, ipatara ang wala.” Mga pasumbingay sa atong Ginoo nga maoy gusto niyang ipasunod sa tawo. Mga pasumbingay nga puno sa gugma, diin kun sundon lang ug itanom sa kasingkasing, mamungag kalinaw nga wala’y kataposan.
Apan dili sayon ang pagtuman sa maong sugo. Dinhi lang sa mga kamantalaanan sa Sugbo, halos kanunay natong mabasahan ning mosunod nga hitabo: “Kabit sa asawa gipatay sa bana.” “Inahan gipatay sa anak nga gikasab-an.” “Crips and Bloods mibalos sa karibal nga gang.” “Kolumnista gikiha’g libel sa politiko.” “Mike ug Tomas nagkinihaay” “Gwen mialkontra sa order sa Malakanyang.” Ug daghan pang panghitabo nga nagmatuod nga dihang gilabay ang tawo og bato, dili pan ang gibawos. Kun dili, mga bala sa kamatayon. Kini tungod kay in every action, there is a reaction. Bisa’g unsa kalinaw ang tubig sa lim-aw, kun mahulgan og bato, mobawod gayod.
Panahon sa eleksiyon, dihang giingnan si anhing Talyux Bacalso sa iyang kaatbang og: “Pisot!”, haskang dalia niyang nakakawonter: “Pisot bitaw! Pangutan-a lang imong misis, kun pisot ba?” Ug kay wala man kanilay magpalupig, nag-iyahay sila’g labay og lapok diha sa ilang pagkatawo nga miresulta sa dakong gubat diha sa natad sa pamolitika. Dili kay sila lang. Halos tanan. Wala kanila’y mapili! Gawas lang sa nailhan nakong Eddiegul, kinsa wala’y kontra kay soft spoken ug subra ka relihiyoso diha sa pulong ug sa buhat.
Ang kalingaw sa tibuok kalibotan magsugod sa tagsatagsa nato ka kaugalingon. Ang kainit sa away dili mapalong kun dugangan nato’g laing kainit. Kay ang pagbuhat sa ingon makasunog lamang natong tanan ug motambog sa atong kalag ngadto sa kalayo nga wala’y kataposan.
Ning pagbukas sa unang panid sa Bag-ong Tuig, 2013, niay New Year Resolution ang tagsulat nga gustong ipaambit ngadto sa tanang katawhan: Sulayan kuno nato ang pagbag-o sa atong kinabuhi. Biyaan ta ang hiwi natong kinaiya ug maoy ihulip ang wala’y kinutobang katarong. Kun labayon ta’g kasina, kasilag ug pagdumot, baslan ta kini sa dalisay’ng gugma. Ug kun laparohon ta sa tuong aping, ipatara sab nato ang wala, timaan sa dako tang pagsakripisyo ug pagpaubos. Niini lang paagiha nga mausab ang laksot nga nawong sa kalibotan nga kita ra sab mismo, tawo, ang nagmugna.
Mao kini ang matang sa New Year Resolution nga kun sundon lang, makahatag og espirituhanong kalipay sa tanan. Ato ning buhaton, Bay!