Transition team ni Baricuatro nasurpresa sa 2025 annual budget sa Kapitolyo

CEBU, Philippines — Ang transition team ni Cebu Governor Pamela Baricuatro nasurpresa sa 2025 annual budget sa kagamhanan sa Probinsiya sa Sugbo gumikan kay namatikdan nila nga adunay gigahinan sa P25 bilyones nga dili kasarangan sa natad sa budget appropriation. Si kanhi Santa Fe mayor Jose Esgana kinsa usa ka certified public accountant (CPA) ug sakop sa transition team ni Baricuatro maoy nibutyag niini atol sa press conference sa niaging adlaw.

Matud ni Esgana nga lahi ang nahitabo sa Probinsiya sa Sugbo itandi sa ubang local government units.

"Kay naay gitawag nga non-office expenditures, moingon gani non-office expenditures unsa man ni outside lang sa mga kada opisina, pero ang gitawag gani nga non-office expenditures murag gilahi na kini siya kay ang source ani for the year 2025 nga gigastohan gamit ron nga budget kon P25 billions in pesos naay P14 billions in pesos nga gi- budget para sa gitawag nga non-office expenditures nga mao ang special purpose appropriations para sa development projects and activities", padayag ni Esgana.

Gikahibudngan usab sa transition team ang pundo nga gigahin alang sa capital outlay tungod kay giingong adunay gisukip niini alang sa maintenance and other operating expenses (MOOE) nga niabot ngadto sa P1.6 bilyon.

Si Esgana nagkanayon nga anaa na kang Baricuatro ang pagtan-aw niini.

Gipasabot ni Esgana nga gipahibawo nila sa publiko ang nakit-an nila sa 2025 annual budget sa Kapitolyo gumikan kay walay miyembro sa transition team ni kanhi gobernador Gwendolyn Garcia ang ilahang pwedeng mapangutan-an.

Sa P25 bilyones nga 2025 annual budget sa provincial government kapin sa P19 bilyones ang gitagana sa office of the governor nga maoy sundon sa bag-ong gobernador.

Wala pa hinuon matino sa transition team kon pila nalang ang nahibilin niini ug magamit ni Baricuatro. (BANAT NEWS)