Scam hub nasakpan

CEBU, Philippines — Rescue operation sa usa ka babayeng wala na papaulia sa mga agalong Chinese nationals, niresulta sa pagkadiskubre sa gidudahang online scam operation sa usa ka subdivision sa Barangay Alang-Alang sa Mandaue City niadtong nakalabay nga gabii.

Na-rescue sa kapulisan ang 23 anyos nga dalagang taga Barangay Kasambagan, Cebu City nga giingong gipugos pagtrabaho bisan supak sa iyang kabubut-on ug gitaguan ang iyahang mga importanteng dokumento.

Tungod ani, giporma ang grupo nga gilangkuban sa Criminal Investigation and Detection Group(CIDG) Mandaue City Field Unit, Regional Special Operations Team(RSOT), Mandaue City Police Station 1, City Intelligence Unit Mandaue City Police Office, Regional Anti-Cybercrime Unit(RACU)-7 ug Department of Social Welfare and Services (DSWD Mandaue City).

Sigon ni Police Lieutenant Colonel Jeric Filosopo, Chief ng CIDG Provincial Field Unit nga sa pag-rescue nila sa biktima nadiskubrehan nila ang daghang gadgets sama sa 40 ka cellular phones, usa ka tablet, 12 computers ug siyam ka computer desktops.

Tungod ani, nagduda silang usa kini ka scam hub. Magpatabang sila karon sa Anti-Cybercrime Group alang sa cyber forensic examination.

"Sa nakakita namin it’s a scam hub kasi may mga presence ng computers, digital equipment, so sa assessment namin it's a scam hub but pero we will request the assistance from the ACG to verify that kasi ipapa-forensic din namin yung mga ano(gadgets, PCs)," sigon ni Filosopo.

Siyam ka Chinese nationals nga nagpangidaron og 30 ngadto sa 41 anyos ang nadakpan. Wala silay napakitang mga passports gawas lang sa mga Philippine IDs nga ang mga pangalan mga Pilipino.

Makig-alayon ang CIDG sa Bureau of Immigration tungod ani. Ang upat sa mga suspek ang nangaangol human sila nisulay og ikyas pinaagi sa paglayat sa bintana.   Sa impormasyon sa kapulisan lima ka buwan na matod pa nga nag operate ang maong Chinese nationals sa maong subdivision.

Hinungdan nga mo-apply sila og cyber warrant aron masusi ang mga digital equipment.

Kasong human trafficking ang ipasaka batok kanila sa pagkakaron.

Giawhag sa kapulisan ang publiko nga kun dunay mamatikdan nga katingad-an sa ilang lugar i-report gyud dayon kini, gipasidan-an sab ang mga property owners nga magmabinantayon sa mga tawong moabang o kaha mopalit sa ilang property. (BANAT NEWS)