Nalumos tungod sa dugso

CEBU, Philippines — Nakit-an na kagahapon ang usa ka spearo o mamanaay nga na-missing sukad pa niadtong adlaw nga Lunes, Hunyo 23, apan wala na kini kinabuhi sa ilawom sa dagat sa Barangay Poblacion sa Lungsod sa Borbon.

Borbon Municipal Risk Reduction Management Office nga si Arturo Suson Dagatan nga nakahinabi sa Banat News miila sa nalumos nga mao si Cyrelle Rivera, 20 anyos, taga  Sitio Tabaylawum , Barangay Cadaruhan sa Borbon.

Matud pang Dagatan, nag-inusarang namana si Rivera sa kadagatan Barangay Poblacion, niadtong Lunes sa alas-9 sa buntag apan wala kini makauli pa.

Sumala pa ni Dagatan nga duna untay kauban si Rivera nga iyahang ig-agaw apan wala kini modayun og kuyog tungod kay gikapoy.

Ang mga sakop sa Borbon DRRMO uban sa mga sakop sa Philippine Coastguard ug mga lokal nga mananagat ug mga kaubang mga spearo ang nagtinabangay sa pagpangita kaniya.

Apan kagahapon pa pasado alas-11 sa buntag kini napalgan gibanabanang 30 ka metros sa kantil nga bahin sa kadagatan sa maong barangay.

Basi kuha sa video sa usa ka Marz D. Cualbar nga usa sa mga mikuyog pagpangita, naamong si Rivera tungod sa isda nga Dugso (Longnose Emperor) nga iyang giapas didto sa ilawom ug maoy hinungdan nganong nahutdan kini og hangin ug nawad-an og panimuot hangtud nga nitidlom.

Atol sa paghaw-as sa iyang lawas, nagsuot pa kini sa iyang tulo ka kilong weight belt nga maoy nakapapaspas sa iyang pagtidlom sa ilawom.

Ang lawas gidala diha sa baybayon diin nagpaabot ang mga emergency medical service sa lungsod ug iyang pamilya. – Anthony Despi, CNU Intern/IBM BANAT NEWS