Bag-ong rate sa toll fee sa CCLEX gipatuman

CEBU, Philippines — Giaprubahan sa Local Toll Regulatory Council (LTRC) ang bag-ong toll rates alang sa Cebu-Cordova Link Expressway (CCLEX) nga ipatuman sugod karong Hulyo 1, 2025.

Ipahigayon ang toll adjustment sa phased rollout uban sa provisional discounted rates alang sa mga motorsiklo nga kabahin sa pagsaka sa regular toll rate review kada duha ka tuig, subay sa kasabutan tali sa Cebu City Government, Cordova Municipal Government, ug CCLEX.

Gitumong kini aron makatabang sa pagrekober sa dugang nga gasto sa konstruksyon panahon sa pandemya ug bagyong Odette nga usa sa nakaapekto sa paghuman sa proyekto.

Base sa bag-o nga giaprobahan nga toll matrix sa CCLEX, dunay P68 alang sa Class 1M nga mga sakyanan o motorsiklo nga dunay 110cc to 399cc nga displacement sa makina, samtang P107 nga dunay 400cc pataas ug duha (2) o tulo (3) ka ehe nga dunay gitas-on nga syete (7) feet sama sa awto, dyip, ug gagmay nga mga van.

Samtang P214 sa Class 2 nga mga sakyanan sama sa mga gaan nga sakyanan, bus, ug tag-as nga mga van, ug P321 sa Class 3 pareha sa mga bug-at nga sakyanan sama sa trailers. Apan aron way kida, sa discounted rate kini magsugod sa P65 sa Class 1M nga mga sakyanan, gisundad sa P100 sa Class 1, P200 sa Class 2, ug P300 sa Class 3 nga mga sakyanan.

Ang CCLEX nakapa-paspas sa biyahe gikan sa Cebu City ngadto sa Cordova.

Matud ni CCLEC President and General Manager Allan Alfron, mapasalamaton sila sa mga motoristang nigamit sa taytayan ug nanghinaut nga ang umento dili makapahunong kanila kay magpabiling luwas ang ilang biyahe.--Shiela Mae H. Agrabio, Anthony Despi, Clifford T. Bacon & Christyll Y. Tecson, CNU Interns/IBM BANAT NEWS