Mga vendor giluiban ni Archival?

CEBU, Philippines — Gipadayag sa Urban Poor Alliance uban ang Civil Society Organizations nga gipangulohan ni Francisco "Bimbo" Fernandez nga giluiban sila ni Cebu City mayor-elect Nestor Archival kabahin sa pagpadali og pag-aproba sa konseho sa "Comprehensive Cebu City Zoning Ordinance of 2025".

Karong adlawa gikatakda ang kataposan nga pagbasa ug deliberasyon sa maong ordinansa apan pabilin nga naglaom ang Carbonhanong Alyansa alang sa Reporma ug Bahandianong Ogma sa mga Nanginabuhi (CARBON), Cebu Market Vendors Multipurpose Cooperative (CEMVEDCO) ug ang Cebu City United Vendors' Association nga tukion pag-usab sa konseho ug ilangan una ang pag-aproba hangtud nga mosulod ang bag-ong mga magbabalaod aron nga mas matuki pa ang reclassification sa Carbon Public Market isip usa ka institutional land-use ug dili kini himuon nga commercial land-use.

Atol sa press conference nga gipahigayon diha sa daplin sa karsada sa Carbon Market nanawagan ang nagkadaiyang hugpong sa mga manindahay nga ipalangan lang una ang gisugyot nga pagbag-o sa Zoning Ordinance nga nagdeterminar sa klasipikasyon sa paggamit sa yuta sa siyudad nga wala ma-update sulod sa 30 ka tuig.

Si Anna Marie Ariosa, pangulo sa CARBON nipadayag nga dili sila mobabag sa Zoning Ordinance apan mas suportahan nila ang malungtaron nga pagplano una nga mohukom ug angayan nga ikonsulta sa tanang maapektohan sa maong ordinansa una nga ipatuman.

Samtang si Fernandez nipadayag nga nabatyagan niya nga nagluib si Archival sa mga taga-Carbon bisan pa man og mao kini ang kanunay nga manalipod sa mga manindahay dihang konsehal pa kini.

 Gikatahong nakita niya nga apil si Archival sa nagkara-kara sa pag-aproba sa maong ordinansa sa dili pa matino nga mga rason.

Gitubag ni Archival ang pasangil ni Fernandez nga kinahanglan ang usa ka aprobado nga Zoning Ordinance is necessary alang sa kalamboan sa siyudad.

Dugang ni Archival nga paninguhaon niya nga makombinsi si Konsehal Jocelyn Pesquera sa pag-withdraw sa kataposang deliberasyon. BDB BANAT NEWS